Trancision energetica, lo debat s’endraia meme per aquelei que se taisan

En principi una Lèi sus la transicion energetica serà debatuda a l’Assemblada Nacionala a la fin de 2013. E per l’alestir, tota una tiera de debats s’endraian tre ara fins qu’au 25 de mai. Es lo Consèu Regionau Paca, au nòstre, que s’encarga de lei bailejar.
 
La Region ne’n organisarà directament, coma aqueu de Manòsca dau 29 de mars, de cotria amé lo Pargue dau Leberon. Seguiràn Gap o Ambrun lei 2 o 3 d’abriu, Niça entre lo 10 e lo 12 d’abriu… e s’acabaràn ‘mé una « jornada ciutadana » lo 25 de mai, dins lei Bocas dau Ròse.
 
Mai li aurà d’autrei debats, qu’elei son pas oficiaus, mai que podrián èstre oficialisats. « Per nosautrei lo critèri es que sigon leiaus » a dit lo Segretari ais Afaires Regionaus de la Prefectura, Gèli Barsacq, au moment que siguèt presentat  lo debat public, diluns 11 de mars 2013. « E transparents » a ajustat Annick Delhaye, la vici presidenta encargada de l’Energia a la Region Provença.
 
Lei debats contradictòris onte es possible en totei d’èstre entenduts, meme se son pas oficialament organisats per la Region o l’Estat, serián labelisats, adonc pres en còmpte dins lei documents que remontaràn au Ministèri de l’Environament. Es benlèu la granda novèutat de tot l’afaire.

De comunas coma Gardana (13) o d’estructuras talas coma lo Pargue Regionau dau Cairàs an demandat au Consèu Regionau son ajuda tecnica per organisar son debat pròpri. « Lo Consèu Generau dei Bocas dau Ròse n’en bailejarà tres » a sostengut  una dei responsablas de son servici Environament : un sus lo chanjament climatique, un autre sus la filiera bòsc e la tresena sus la precaritat energetica.
 
Fau saupre que, dins aqueu despartament, lo CG13 a ajudat mai de dotze mila familhas per pagar seis impagats en 2010. N’i a tanben fòrça d’impagats a Niça. Lo problèma es societau, e lo debat serà pas qu’environamentau. Coma en temps de crisi, lo monde pagarà son energia, s’aquela, mai « pròpria », es inagantabla per mai que d’un ?
 
La noveutat dins aqueu debat es benlèu que sei bailes vòlon favorisar la paraula d’aquelei que parlan pas de costuma. « Avem demandat a l’agènci que s’ocupa de l’organisacion un biais de favorisar l’expression dau monde de la carriera » a precisat una directritz de servici dau Consèu Regionau. 

Serà tota l’escomessa, de capitar un debat vertadierament public. Am’aquelei que son acostumats de dire son biais de vèire, e pereu aquelei que devon pas suportar lei chausidas sens i participar. Per aquelei, un formulari tipe per dire son avejaire, am’un document d’informacion sus l’enjuec, devriá èstre distribuit an’aperaqui 200 personas. Chausidas per sa non participacion abituala ai debats, seràn meme desfraiadas per participar an’aqueu.