Aqueu mèl per vos anonciar la presentacion (e la lectura) de la correspondéncia dau marqués de Sade ambe Milli de Rousset, a Lacòsta dins la Vauclusa, lo 7 d’avost a 18 oras, au Temple (sala Janòt Madon).

Adieu bel ange, aquò es lo títol d’un libre que vèn de paréisser en cò de L’aucèu libre, ostau d’edicion que fai mirandas per lei letras d’òc.

"S’agís aquí de ren mens que de la correspondéncia de Milli de Rousset ambe lo marqués de Sade. L’editor scientific n’es Joan Ives Casanòva qu’avèm pas besonh de presentar a-n un public occitanista: es un especialista de lenga e literatura d’òc. E es en aqueste títol que faguèt aquesta edicion: Milli de Rousset e lo marqués s’escrivián de fes que i a en provençau, sovent de gròs lambiàs d’occitan au mitan d’una letra en francés! E lo divin marqués, cu l’auriá cresegut, faguèt de rimas dins la lenga de sei païsans Costassencs! N’avèm la pròva dins aqueste libre."


Joan Ives Casanòva ne'n farà una presentacion que serà acompanhada de lecturas per Gui Matieu.

Milli de Rousset-Marquis de Sade – Adieu bel ange – correspondance, edicion de Joan Ives Casanòva - L’aucèu libre - 2025. 18€