Sant-Gervàsi, lo festenau sensa competicion

''Rescontre'' es un pauc l'istòria d'una passion per lo cinèma, que se parteja, que se duèrb au monde e que vèn populària.

 

Partida de pauc, l'associacion de videastas amators Rayons d'oc aguèt l'ambicion fòla d'acampar lei gents, de toteis atges, de totei mitans, a l'entorn d'un eveniment que se fai pauc a cha pauc un nom.

 

 Aqueu festenau, es Miquèu Gravier que ne'n bastiguèt lo concèpt : « voliáu organizar un festenau en assajant de faire clantir la lenga ». Lei videòs son rodadas en Occitania mai tanben en Catalonha.

 

Miquèu se felicita de « la majoritat de realizacions en lenga nòstra ».

 

D'aitant mai que leis objectius grands d'aquela manifestacion son « la difusion de corts-metratges en occitan ò tractant de la vida occitana e de seis aspècts lei mai divèrs ».

Anne-Marie Venture, ela, ven d'Aigas-Mòrtas. Se rendèt au festenau per lo promier còp.

 

 « Lei gents s'i senton sensa concurréncia, es mielhs » que jutja, e d'apondre « car an pas vergonha de venir presentar quicòm ». Per Joseta Brunel, que participèt au festenau embé son film « La vòta en Aigas-Mòrtas », aquela abséncia de competicion li convèn : « ieu presente pas un film per la glòria... puèi la competicion me sembla una istòria de patricolatge ».

 

La volontat de supremir lo concèpt de concors dau festenau ten subretot dau « pauc de mejans que possedís Rayons d'oc, emb un subrecòst d'organizacion que li sariá fatau » segon Miquèu Gravier.

 

Vengut d'Arle per d'en promier acompanhar sa femna, Roland Roux regreta de pas « aver agut de disctuda sus lei films », subretot a l'entorn d'un reportatge (Darnier passat) que, per eu, « aviá un discors excluant ».

 

Ais uelhs d'Anne-Marie, lo festenau permet tanben de « se trobar embé lei gents que senton la mema fe per lei memei causas : lei tradicions e la lenga ».

 

Guillaume Chevalier, eu, es un collegian de 14 ans que viu a Vauvert. Parla la lenga nòstra mai, subretot, faguèt l'objèct d'un documentari de Jérémy Durand (participant au festenau) a l'entorn de sa passion per lo costume arlatenc.
 
Guillaume s'expausèt davant un public encantat de veire son travalh de cordura. « Es fòrça esmovent » que ditz a prepaus de la difusion.
 
Vengut per lo promier còp, vei en aquel eveniment un « festenau fòrça interessant embé de subjècts pron variats ». Admet apreciar lei films prepausats « mai per lo contèxte que per la fòrma », quet que siegue adonc, lo nivèu dau videasta.
 
Lo public se diversifica, coma se diversifican lei films. « La frequentacion es en auça, subretot gràcia ais esfòrts realizats en comunicacion » constata l'organizator.