partager
Lei 4 e 5 de fébrier passat lo vaissèu de l’associacien SOS Méditerranée Ocean Viking a poscut secorrir 422 refugiats en mar en tres etapas e deuiá lei desembarcar en Sicilia, a Augusta.
Lo batèu èra en detencien administrativa despuei cinc mes en Italia, e, quand siguèt liberat en janvier, metiá lèu lo cap sus Marselha, onte demorava a cai durant dètz jorns, per carantèna e tests de covid.
An aquela ocasien, lo municipe de Marselha a decidit de li votar una ajuda de 30 000 €, es a dire l’equivalent dau cost de dos jorns en operaciens de sauvament. E d’èstre sòci de la plataforma de collectivitats sosten d’aqueu moviment d’ajuda ai migrants perduts en mar. Aqueu diluns la deliberacien, ligada a doas autras, a fa bofar un brave còp de mistrau dins l’emicicle dau Consèu Municipau. Presentada per Michèle Rubirola, l’efemèra premièra cònsola, e ara premièra ajoncha, la prepausicien a provocat la rabia
dau cònse dau cincenc sector de Marselha, Lionel Royer-Perreaut. L’elegit Les Republicains menarà l’afaire davant lo Tribunau Administratiu, qu’a fa saupre via lo malhum sociau.
La Vila de Marselha a tanben decidit d’aderir a l’Avita : Associacien Nacionala dei Vilas e Territòris d’Acuelh ; e encara de pactar amé l’Estat per milhorar lo biais d’aculhir lei refugiats.
Segon l’Ofici de l’ONU per la Migracien (OMI), entre 2014 e 2020 lo nombre de mòrts de migrants durant la traversada de la Mediterranèia auriá passat lei 20 000.
Coma fan lei bierraires de Georgia ?
