Lo Mistral bofarà per lei afairistas

« Compausat de veituras deliciosament vintage…devèn un luec originau e atipic… ». Lo Mistral que religava París e Marselha en 9 oras tre leis annadas cinquanta, lo vaquí reciclat en trin glamour per òmes d’afaires que vòlon una taula per parlar chifra d’afaire entre banquiers o industriaus.
 
La filiala d’eveniments de la SNCF, Trains Expos Evénements, l’a reviscolat mai li a gardat son envelopa d’inòx per aquò.

E desenant , serà l’endrech onte se parla contracts e autreis estrategias d’entrepressas.
 
Benlèu que deman es dins lo Mistral que se vendrà lo Rafale…

Tre 1948 tirat per una locomotiva negra au carbon de tipe BB, va siguèt a partir de 1952 per una motriça electrica, que li fasiá ganhar de temps.

S’arrestava ren qu’a Lion e simbolisava dejà lo biais de la SNCF, que delaissariá totjorn que mai lo desplaçament de proximitat, au benifici dei grandei linhas.
 
Trin dei gents cochós   que volián rejonhe la capitala francesa a la provençala, finalament siguèt empachat per la concurréncia de l’avion tre leis annadas 1970, e siguèt remisat d’un còp en 1982, amé la dubertura de la linha TGV entre Paris e Marselha.