Jornalet cerca lo mejan de contuniar

Jornalet se finança mai que mai amb la collaboracion de sos legeires. Nasquèt en març de 2012 gràcias a la generositat de dos mecènas que cresián al projècte, e tanben gràcias la publicitat institucionala de tres collectivitats importantas. Quant Jornalet nasquèt aviam previst qu’auriam pro de ressorsas publicitàrias, gràcias a la difusion del quotidian numeric. Mas, d’un latz, Google Ads acceptèt pas de publicar d’anóncias car son traductor automatic compren pas l’occitan.

D’autre caire, nos a estonat lo pauc interès per de las collectivitats, los productors e las societats del país per i publicar publicitat. Esperam totjorn que qualque entrepresa, comèrci, bar, un restaurant, ostalariá, servici o ofici public de la lenga considère qu’es bon de publicar de publicitat sus Jornalet.

Amb lo temps, trobèrem lo biais d’obténer un petit salari modèst (de còps simbolic) per las personas qu’i trabalhan cada jorn gràcias a la naissença de l’associacion Los Amics de Jornalet e de la linha de subvencions per la promocion de l’occitan de la Generalitat de Catalonha. Las subvencions son fòrça modèstas. Es totjorn amb las campanhas de collectatge d’argent que fan los Amics de Jornalet que podem anar endavant.

Los Amics de Jornalet  es una associacion de drech francés (lei 1901) creada per sosténer aqueste jornal web occitan. A mai, i a l’Associacion per la Difusion d’Occitània en Catalonha (ADÒC), qu’es qui publica Jornalet e qui gerís las subvencions de la Generalitat de Catalonha.

Ongan, prepausan un nòu biais d’ajudar Jornalet que nos sembla fòrça pus digne e productiu. Avèm mes en linha una botiga ont se pòt crompar las revistas de Jornalet  en papièr, una seleccion de libres en aranés e los lobres de l’IEO Arièja. La librariá permet de crompar en linha, d’ajudar a pagar los pòrts de mandadís e quitament i a una opcion d’apondre una contribucion volontària per nos ajudar.

Quand d’argent nos cal ? Pel moment avèm investit tot l’argent qu’aviam a bastir un nòu sit web qu’es pas encara acabat. Après nòu ans en linha, cal una mesa a jorn e adaptacion als nòus espleches e rets socials. A mai, es urgent d’i installar d’espleches per evitar los comentaris anonims e lo piratatge dels mecanismes de participacion. Quand arribarà la subvencion de 2021, sauprem quand d’argent poirem recebre ongan o poirem calcular.

Pel moment sèm a trabalhar a gratis. Çò que demora o salvam per de despensas coma lo serveire d’internet, los impòstes, la pòsta o l’assessorament fiscal.