Destrucis a Frejus

Fa mai d'un an que la restauracien de l'arena de Frejus es acabada. Un còp dau mes li passi davant en anant au coifur... e pasmens me li poadi pas acostumar.

Eri anat veire lo resultat deis òbras, au defòra e au dedins, après l'inauguracien, e n'èri restat candit. Lo monument roman es estat descarat, escondut sota d'estruturas de ciment e de fèrre. Coma lei "Monuments historiques" an poscut laissar passar lo projèt d'aquela marrida accien? An vogut faire un espaci modèrne per leis espetacles d'estiu, an capitat !

Dins l'arena de Frejus convidaran cantaires e dançaires mai plus jamai toreros, peones e picadors. Lo cònso vòu plus de corridas. Aquela arena avié l'originalitat d'èstre la mai orientala dau monde de la tauromachié. Per trovar una corrida au levant de Frejus falié anar... au Mexique !

Vos dirai que sieu contra la corrida mai pas un adversari acarnassit. Sieu pas vegetarian e se duvieu faire la tiera deis eisèmples dei bèstis que l'òme fa sufrir lei pajas dau jornau bastarien pas. Quauquaren mi tafura dins la garrolha dei pròs e antis. Leis anticorridas mai incondicionaus son aquelei que voalon lei lops sus nòstrei montanhas e ara dins nòstrei coalas tamben, sènsa pensar ai centenas de fedas e d 'anhèus que nen son lei vitimas. Un buou de combat viu vint minutas de calvari. Una feda nafrada per lo lop viurà dès, vint, trenta oras de calvari avans de crebar.