Au trin que van lei causas…

Vint dau cent dei trins regionaus acusan un retard. Fa un brave moment que la Regien Provença romega e tòca d’argent de penalitats : « entre dos e cinc miliens per an, segon lo niveu d’aquelei retards » qu’a ben vòugut reconéisser Guillaume Pepy, lo president de la SNCF, vengut en persona a la Regien, divèndres 29 de janvier, per signar una convencien amé Christian Estrosi, lo novèu president de Regien.
 
Aurián totei dos agut una discutida chavanosa lo 21 de decembre passat, alòr qu’Estrosi veniá tot bèu just d’èstre elegit.

E coma la règla dei vint dau cent marchava pereu per lei fraudas, li an fach encara un subjèct per se charpinhar. 

Lo resultat n’es la convencien que lei ligan ara per, d’un costat, remborsar una briga lei usatgiers que patisson d’aquelei retards, empacha màger dins una jornada de trabalh que comença o que s’acaba, e d’un autre latz mai cochar lei non-pagaires que montan dins lei trins.

Lo sistèma de remborsament passarà segur per la Regien, qu’empochava jusqu’ara lei miliens per lei versar au budgèt generau. Mai deu èstre « experimentat quauquei setmanas » dins lo Var, ditz G. Pepy.
 
E tres sistèmas de portegues son ara a l’estudi, que la SNCF deurà leu ne’n chausir un. Mai la Regien a demandat au pòle de competitivitat Soluciens Comunicantas Seguresadas d’imaginar un biais de destriar tot d’un còp lei marrits pagaires e lei calachnicòvistas que podrián montar dins un trin… Aquí tanben totei prometon una responsa ben lèu. E, segur, signe dei temps, la telesusvelhança serà encara afortida.
 
De tot biais l’epòca sembla pas favorabla a una analisa sociala dau fenomèn de frauda, dins una Provença onte s’amolonan lei paures e caumaires que vivon sa situacien coma l’enebicien de bolegar.
 
Am’ aquò, s’oblida un pauc que, a ce que sembla, l’ofèrta de la SNCF en trins regionaus baissarà. Am’un sens de la formula, lo president Estrosi resuma ce que vòu faire : « mens de trin, de trin melhor ».
 
Au revenge, per limitar l’efèct deis empachas materialas ai trins, pensa de ne’n milhorar la mantenènça, am’un novèu atalhier, que la SNCF bastirà en país nissart. A l’ora d’ara totei lei trins regionaus son reparats a Marselha Blancarda.