D’ajudas ai libraris provençaus

« Mantenir un malhum dense e diversificat de difusion de libres e engardar una creacion editoriala pluralista exigenta » seriá la tòca dau dispositiu de sosten que, de cotria , an creat lo Centre Nacionau dau Libre, l’Estat e la Region Provença am’ un acòrdi quadre per leis annadas 2016-18. La Region vèn de se faire lo resson de l’apèu a projèctes 2017, que podriá aprofichar ai libraris. Leis ajudas a l’innovacion (en particulier dins lo numeric), a l’investiment e a la comercialisacion podrián anar fin qu’a 15 000 € en subvencion, o a 70% dau budgèt globau dau projècte, que deurà pas comptar mai de 80% de financiament public.
 
Per presentar son projècte, lo librari deurà tambèn plantar cavilha en Provença, vendre au public am’una susfàcia d’au mens 25 m², realisar de 25% a mai de 50% de son chifre d’afaires amé la venda de libres segon que rèsta dins una vila de mens o mai de 10 000 abitants, e de tota mena prepausar un minimom de 1500 títols nòus a la venda.

De sotalinhar que lo dispositiu es tambèn dubèrt ai projèctes de duberturas de librariás. Es alora lo projècte previsionau que serà avalorat per lei professionaus dei organismes citats.
 
Lei bòns contactes pèr lei portaires de projèctes son, au Centre Nacionau dau Libre Sarra Ghorbal  (tel. 01 49 54 68 06 ) e a la DRAC Louis Burle , lo conselhier per lo libre, leis archius mai tambèn lei lengas de França ! (tel. 04 42 16 19 96)