Coma cada an, la davalada se’n torna e amb ela… lo Festival Occitania ! Per aquela edicion, vos balham rdv per 24 eveniments per descobrir las creacions occitanas actualas, e vos podèm ja assegurar que cadun·a i traparà son compte ! Al programa : musica, dança, literatura, cinema, teatre, visitas ; entre Tolosa, Murèth, Blanhac, Rius Volvèstre, Cunhaus, Pinsaguel o encara Caraman, la còla de l’IEO 31 e sos partenaris vos esperan per festejar la lenga e la cultura occitanas !

Començarem tre lo 2 d’octobre a l’Utopia Borderouge amb un rencontre-discutida abans la projeccion del filme de Claude Sicre “Roots Tour”, dins l’encastre del festenal Peuples et musiques au cinéma, partenari novèl del Festival Occitania.
Se’n seguirà l’endeman la 6ena serada electrotrad al Dada, marcada pel retorn d’Henri Maquet aliàs Delta Sònic, òme orquestra de las musicas tradicionalas del 3en millenari, amb son vaissèl extrà-temporal d'exploracion de monds sonòrs ! E coma de costuma, lo transe-òc vinil mix de Mr Brun & La Mascanha, mix 100% vinils occitans ! Un autre mix de manca pas, lo de darc creatura dificila a classar, per un dj set cantat e parlat qu'oscillarà entre ambient e musica dançarèla, per destendre lo còs e l'esperit. Se passa lo 18 d’octobre a La Gougnotte, acompanhat d’una exposicion fotografica d’Estèla Blenet !
De concèrts, ne’n mancarà pas : Noubalòtcha a la Cave Po’ per la Waada René Gouzenne, Amaneja amb Pauline Kamakine e Esteban Dehos a la Topina, Polifònic System & Chabraille a Pinsaguel, e lo grop de Nissa Nux Vomica al Cabaret Le 9

E per vos far dançar, un casting de tria per de balètis a bodre : Camille en bal, Triplette, Suberdaurada, Bolbena, Manu Isopet… sens doblidar lo Fest-noz balèti de Breizh en òc que clavarà las festivitats lo 15 de novembre amb Coquelicot de Fogo e los bretons Lors Landat e Thomas Moisson.

Costat teatre, aculhirem Monica Burg e François Dumeaux per “D’una lenga l’autra” dins una serada dedicada a Marcela Delpastre, en partenariat amb lo magazine Lo Diari. Tanben, poiretz assistir a l’espectacle “Cornamusas occitanas pels nuls” de JM Espinasse e “Jogarem pas a Tolosa” (aquò, veirem ben!) de la tropa ariegesa Les Galejaires.

Ongan, vos poiretz passejar per carrièras amb 3 visitas tematicas : l’emblematica “Tolosa en òc” de JM Leclercq, “amb Godolin” e Avelina Fabre, e la tota novèla “Afars sensibles”, totjorn amb Avelina !

Enfin, una serada especiala “Descobèrtas occitanas” se tendrà lo 7 de novembre a las Halles de la transition à Tolosa amb un fum d’animacions : mòstra e talhièr de serigrafia amb Cecila Chapduèlh, de projeccions amb Dètz, e pel primièr còp sus l’empont, un concèrt amb Occitan Covers !

Vesètz, auretz pas léser de languir en octobre e novembre ! Per trapar lo programa complet e detalhat, rendètz-vos sul site internet www.festivaloccitania.com o sus Facebook e Instagram.