Silvan Chabaud, un premiat especialista de Belaud de la Bellaudièra coma de la musica engatjada

Robèrt Lafont, Jan-Bernat Plantevin, Pèire Pessemessa, Patrici Gauthier, Andrieu Neyton, Felip Martel, Claudi Barsotti, Jan-Marc Courbet entre autres siguèron premiats a Ventabren per lo Grand Pres Literari de Prouvenço aquelei ultimeis annadas, per una distincion qu’onorèt per premier còp Joan Proal en 1961. Puei, puei… l’iatus de 2020, puei 21, puei 22… la pandemia aviá trencat lo fieu sang e òr. Aurián poscut crèire a la fin de l’aventura, bòrd que la còla associativa se disiá alassada . Fins finala non ! Vaquí adonc lo Grand Premi un còp de mai remes, coma d’acostuma an un òme qu’a d’un costat fargat una òbra literari, d’un autre latz qu’a fa per lo partatge de la lenga nòstra.

Silvan Chabaud, nòstei legeires lo conéisson, que siguèt entrevistat aquí mai que d’un còp, per la sortida de sei libres, per lei concerts de son grope de ragamuffin, o per sa tèsi sus Bellaud de la Bellaudièra.

« S’acontenta pas d’un saber esctrech, que sa premiera aventura comença amé lo ragamuffin en 1999 amé de gropes de musica moderna » a dich per lo presentar Felip Martel, un entre sei mestres a l’Universitat Pau Valery onte ara ensenha Silvan Chabaud. Amé son grope Mauresca Fracàs Dub a cantat la fèsta, « e tanben de problemas de societat bòrd que son engatjats ».

Autor d’una tèsi de referencia sus « son vesin » Belaud de la Belaudiera, de Grassa, quatre siecles après sa vida gargantuesca, Silvan Chabaud a pas limitat son pretzfach a la coneissénça d’aquel autor màger de la lenga d’òc. A tanben produch nòu CD amé Mauresca, escrich e publicat de recuelhs de poesia en òc a partir de 2012, en particular Montar, Aubres, e en 2022 Peiras sècas.

Naissut Varés, a fa seis estudis a Montpelhier « perquè voliáu faire d’occitan e qu’au mieu èra pas possible », la tòca dins leis universitats provençalas es ailàs pas de preparar lo monde a ne’n faire son mestier.

A l’ostau la bibliotèca aviá de libres en occitan e lo joine Silvan lei vesiá coma de causas fantasticas : « de libres plen de promessas, que portavan lo sageu. E per ieu aquelei libres que podiáu pas encara legir, avián un perfum de mistèri e fabulos. » sabiá pas que seis escrivans seriá un jorn sei professors : Felip Gardy, Gerard Gouiran, Florian Vernet e d’autres.

Un còp a l’universitat, pasmens, comença per faire la fèsta, e de causas seriosas per faire viure l’occitan… de musicas ! Ja èra influenciat per lo Massilia Sound System, e amé d’autres crear Mauresca Fracàs Dub, per eu siguèt «  una part de mon aventura, essenciala per ieu e, cresi, per tota una generacion. »

A Ventabren, a la fin de sa dicha, Silvan Chabaud a tanben rendut omenatge au trabalh particular deis editors d’òbras en occitan : « a cadun sa part ! Elei, a còntra suberna de tot, li fau èstre au corrent de tot, tant dau mercat dau libre coma dei politicas de subvencions »