Nòstreis alergiás serián neandertalencas

Lei Provençaus serián addicts au tabac e mai depressius ? …Coma tot plen d’Europencs. Segur qu’es la fauta a sei rèires dau Neandertal ! Lei còlas de caçaires qu’an laissat d’otís  e d’òsses de sa caça, fai 60 000 ans aperaquí , a costat d’una cròta de Metami, entre Liberon e Ventorn, serián responsables de mai que d’una empacha de l’òme modern…
 
Un estudi american de l’Universitat Vanderbilt (Tenessee) a carculat l’ADN de 28 000 personas que sa familha vèn d’Euròpa. E lei cercaires an cercat sa part d’ADN que nos vèn de Neandertal – aperaquí entre 1 e 4% de l’ADN deis Europencs. E an chifrat la relacien entre aquela part de l’ADN e mai que d’una feblessa umana, bòrd que toteis aquelei pacients èron sonhats per un o l’autre auvàri .
 
« Nòstre resultat principau es que l’ADN de Neandertal influéncia lo profieu clinic de l’òme de vuei » qu’a conclús John Capra, un deis autors de l’article de la revista Science, onte siguèron publicats lei resultats.
 
« Li a una associacien entre aquela part de l’ADN e tota una tiera de malautiás, tant neurologicas, psiquiatricas, coma imunologicas o reproductivas » qu’a ajustat.
 

Ansin de l’adiccien au tabac, que l’òme de Neandertal li seriá estat dispausat, maugrat qu’au metge Nicot li mancava quauquei milenaris per crebar l’uou … O la depressien nervosa ; o encara un sang mai lord, fach per resistir ai virus, mai que favorisa ara lei alergiás e lei malautiás dau còr.
 
A l’epòca luenchenca onte nòstrei rèires caçavon dins lei monts de la Vauclusa, segur que lo sang mai lord leis aparavan còntra tot un ventalh de parasitas. Mai ara que son pas tant presents, aquelei, la responsa imunitària dau sang contunha de se manifestar, e entraïna de crisis d’alergiá.
 
Grandmercé, papet Neandertal !