Mestiers d’autre temps amé lo Forum d’òc

Sota lo calabèrt d’aqueu domèni de Carbassa, a Miramas (13) lo martèu pica e pica, un bruch que fa lo talhaire, sensa relambi. Un pichon percors nos farà vèire leis afogadas dau botis, lo fabricant de tap, lei dos fornier qu’alestisson lo dinnar, e lei fremas reviscolairas de matalàs, amé lo fabricant de cledas de canissas, que lo paure ven de se nafrar lo det amé son son talh dau « cuter » !

Lo Forum d’Òc a vòugut aquela mòstra vidanta dei gaubis de nòstrei rèires, e l’Escolo de la Targo de Tolon es venguda en fòrça per fa vèire au brave monde aquelei dos patrimònis remirables dau país : sa lenga e sei vielhs gaubis. Guiu Revest serà pas lo darrier a ne’n parlar, eu qu’a sachut donar l’envam a tota una còla d’afogats, coma Soufio, venguda despuei Paris per viure en Provença fa doge ans, que « s’interessa fòrça ai tradiciens… e que parla ara una briga en lenga nòstra, a ma mòda… es a dire sensa vòstre accent ! »

Marc e Gerard son la cavilha obrièra d’aquela jornada, elei que per l’associacien locala Laissa dire, an fargat una polida mòstra de panèus de legir lèu am’un biais de fa vèire que nòstre occitan es fins finala pas tant estrangier an aquelei que fins qu’ara parlan ren que francés. « Li parlam d’activitats tradicionalas coma lei juecs de bochas mai tanben de la pratica moderna dau percors, es a dire dau « trail » nos ven Gerard Roussel… « es que la lenga es facha per charrar de tot, e pas solament dei cigalas ! ».

L’associacien siguèt sostada per lo municipe, e l’ajoncha a la Cultura Pauleta Arnaud, nos dirà que "la Comuna sostarà totei leis iniciativas fachas per partejar la lenga, patrimòni immateriau mai indispensable dau país », ce qu’a fa amé la mòstra de Laissa dire.

Am’ aquò, un còp alestits totei leis estands lo brave monde associatiu s’es més a taula per un dinnar en comun, esperant lo public per l’après dinnada.