Marselha Bellevue, l’escòla qu’ensenha lei culturas dau monde

Tèn una plaça particulara dins l’univèrs escolari marselhés, Vera Tur. Aquela directritz de l’escòla comunala dau Pargue Bellevue, au quartier de Sant Mauront, fa rescontrar d’autreis escolans venguts de minoritats de diferents païs dau monde.
 
Joines Indians d’America, Lapons, autreis Indians dau Mexic aqueu de còp, Maòris de Novèla Zelanda… chasca annada o quasi despuei, aquelei joines Marselhés fan escòla dau respèct de l’autre, prenon consciéncia de la granda diversitat dei culturas, dei lengas que son pas totjorn aquelei deis Estats, e endraian un percors escolari fòra dei nòrmas que li dona mai l’astre de capitar.
 
Ven, l’escòla, de publicar dins son edicien In Octavo, un librilhon consacrat a son projèct menat amé l’escòla de Puebla, au sud de Mexicò. Bèn polidament illustrat, rensenha tanben sus lei lengas parladas au Mexic : castilhan, segur, qu’es aprés a l’escòla Bellevue,  Huichol (dei Mayas) amé lo Náhuatl, e mai cinquanta lengas indianas mens coneissudas.

Sant-Mauront, e mai precisament aqueu Pargue Bellevue, un ensems residenciau monumentau privat bastit per de pès negres mai que lèu siguèt occupat per d’immigrats, provesisse l’escòla quasi a cent dau cent d’escolans venguts de l’immigracien. Li faliá, per luchar còntre la cabussada escolari, un biais de faire fòra dei convenciens abitualas.
 
A l’intrada deis annadas 1990, Vera Tur comencèt per endraiar un projèct, far conéisser leis Indians dau Middle West deis Estats Units d’Americas. Amé l’ajuda d’un cantaire Sioux Oglala, lo regretat Will Wagonburner, aquela mestressa apassionèt seis escolans per aquela cultura en dangier. L’an d’après, èron au mitan dei Planuras americanas dins una resèrva Sioux. Puei, leis escolans indians venguèron a Marselha. De l’estonament recipròc, una dubertura benvenguda toquèt aqueleis escolans, bèn motivats dins son trabalh.
 
Au mes de febrier, siguèron convidadas a Marselha per l’escòla,  per testimoniar de son percors, lei premieras joinetas Sioux rescontradas, que despuei 1994, segur, son devengudas de joineis adultas.

C'est le titre du livret qui relate le projet de l'école Bellevue. 48 pages illustrées, à commander (10€ par chèque ordre AMCP + 5 timbres tarif en vigueur) à AMCP c/o Tur 20 rue de Crimée - 13003 Marseille.