A Niça, l’escòla bilinga deis Arangiers aurà son CP

L’escòla deis Portegaliers , a Niça, veirà finalament durbir una classa de Cors Preparatòri a la rintrada dau 2015. E li familhas deis escolans lu pòdon ja faire marcar.
 
Èra pas ganhat, « vist que despí de mes l’Admenistracion faía lo chut-chut, restava muda davans li noastri inquietudas » di Olivier Pasquetti, president de l’APLR, l’associacion d’ensenhaires d’occitan de l’Acadèmia de Niça.
 
Eu si di segur qu’èra un mejan de laissar passar lo moment d’organisar aquel ensenhament.

Sensa desbocament en primari, li tres classas de mairala seríon devengudi una mena de carrièra bòrnha.
 
Acadèmia e Vila de Niça, sollicitats per lu parents, l’APLR e la Federacion d’Ensenhaires de Lenga e Culture d’Òc (Felco) an finalament recebut totplen de missivas pleni d’ ànsia , divendres passat.

Demandavan la dubertura esperada, per que lu escolans posquésson perseguir l’ensenhament bilingue que s’es endralhat en lo 2013 en mairala.

D’urgença, diluns, L’Inspeccion Acadèmica dei Aups Maritimi e la Vila an passat una convencion per durbir aquela novèla classa, la quatrena de l’escòla.

Pi lo premier cònsol (que devia èstre investit per l’UMP ai Regionalas dins la jornada) mandava un comunicat per l’anonciar.
 
Un mèstre mé la capacitat d’occitan, ò CRPE, deuria èstre nomenat sus dorsier, per la rintrada.
 
L’escòla dei Portegaliers es publica, ma m’una filièra bilingua dont lu parents poàdon marcar lu sieus nistons.

Èra un projècte de parents que volíon, mé l’associacion Òc-bi, endralhar un ensenhament de l’occitan.  

Ecrit en niçois avec les suggestions lexicales de Reinat Toscano
Lire aussi : Nice se donne les moyens d'inscrire dans la classe bilingue des Orangers