Lei « corsets roges » troban la solucien per lei « jaunes »

« La mai pichona part dau librilhon de desvolopament duradís finança la transicien ecologica, l’economia d’energia e l’economia sociala e solidària, coma dison. 10% e pas mai ! »

Aquélei produchs bancaris d’esparnhe, vint e quatre miliens de Francés li meton cent sièis miliards d’€uros. Pasmens, la màger part serve a financiar d’activitats que degun n’en saup ren de ren, díson Atac.

L’entitat d’intervencien sociala debana una campanha per denonciar aquela situacien neblosa, opaca, que díson. Amé sei corsets roges èron dissabte dins mai que d’una vila a n’en parlar, au mume temps que d’àutrei corsets, élei jaunes, èron a bloquejar de centres comerciaus per denonciar la manca de poder de crompar.
 
Lo librilhon DD podriá tant pagar l’economia de l’efècte de serra coma la recèrca petrolièra, ditz lo monde d’Atac. Valèria Brulant, la clavairitz de la còla sestiana, rementa que doás cent entrepresas multinacionalas fan nonanta per cent de l’emissien de gas d’efècte de sèrra. « Vèndon aqueu produch a de monde que pènson coma aquò qu’es per financiar la transicien ecologica ». Normau adonc que vòugan pas la pagar encara am’una taxa sus lo carburant coma l’impausarà lo govèrn.
 
En veritat quaranta per cent d’aquela soma rèsta ai bancas, e seissanta per cent van a la Caissa dei Despaus e Consinhaciens – qu’es un organisme d’investiment gestionat per l’Estat.
 
Adonc Atac s’endralha dins una campanha per dire ai capoliers qu’avans de prendre dins la pòcha dei paures e dei trabalhaires per la transicien, deu començar per emplegar l’argent disponible dins seis pròpris organismes « per financiar per exemple de transpòrts en comun, en luec de barrar lei garas e de desfavorisar lo tren, escafant lo fret ».