La pressa marselhesa cèrca de reprendre alen

Alòr que Marsactu e son cadet Marséco, dos jornaus pure player de Pèire Boucaud son estats liquidats fa doas setmanas per lo Tribunau de Comèrci de Marselha, lo sòrt dau quotidian La Marseillaise es encara incertan.
 
Lo TCM deviá jutjar entre doas ofèrtas de repressa, o decidar de la liquidacien d’aqueu jornau creat dins la clandestinitat en 1943.
 
Una premiera audiéncia siguèt remandada au 21 de mars un premier còp a la debuta dau mes, mai lo tribunau a decidat de laissar encara jusqu’au 7 d’abriu ai candidats, per afortir son ofèrta.
 
« Lei bancas son pas am’aquela de  Jan Marc Adolphe, que lo seguirián pas ; nos vèn a la barra  dau tribunau sensa argent » pensa una delegada dau personau. 

Aqueu, pas ben coneissut dins aqueu monde, s’es acampat ‘mé Fabrice Kehayan, un consultant que baileja una societat ad-hoc « Les Nouvelles Éditions marseillaises ».

Eu es tanben l’enfant de Jan, ancian correspondènt de l’Humanité a Mòsco e celèbre dissident au Partit Comunista Francés.

L'avantatge per la còla de La Marseillaise, es qu'eu assegura que gardarà l'estampariá e seis obriers. Aquelei qu'an justament endraïat una cauma per gardar son emplec.

 
L’autre candidat es lo president de la Federacien 13 dau PCF, Pierre Dharréville, qu’a creat Les Editions des Fédérés. Sembla d’aver mai la fisança de la part dei jornalistas d’aqueu quotidian comunisant.

Mai vaquí q'ueu pensa far estampar La Marseillaise au defòra, benleu 'mé benleu una estampariá dau PCF.
 
Mai lo TCM podriá considerar que ni l’una ni l’autra ofèrta son seriosament en pausicien de far viure aqueu quotidian emblematic de la gaucha provençala, que publica, va sotalinhan,  chasca setmana, una pagina en occitan.
 
A Marsactu, lo TCM va preniá pas tant d’aise, que l’a liquidat fa pas un mes. Aquí li aviá sèt salariats pas mai. Mai aquelei cèrcan a l’ora d’ara de remontar l’afaira solets.

Mai vaquí qu’un grope privat vòudriá crompar lo títol… mai pas l’afaire, ce que laissariá lei jornalistas caumaires. Frederic Benoît, PDG de Millenium Press crompariá lo fons de comèrci a RAJ Medias, l’entrepressa de Pèire Boucaud, que bailejava Marsactu.
 
Aqueu grope, que publica Arts Magazine, Viva Déco o encara Enquêtes Criminelles, fòrça aluenchats de la tòca enquistairitz de Marsactu, li agrada pas fòrça ai jornalistas, qu’elei assajan de reviscolar son jornau.

« Vesem mau coma podriá ambicionar de seguir la mema rega editoriala » que dison, dins un messatge sindicau.