La guerra dau fuec qu’E.on a atubat

« Uei, de comunas se fan pregar per provesir la plata fòrma qu’avem creat per lo bòsc dei caudieras de tot lo relarg ». Au micrò davant la comuna de Gardana, vaquí Pèire Honoré, ancian elegit de Sant-Estève, au pè de Lura. S’es esmogut que lo projèct d’enegia bòsc de mai que d’un vilatge d’Auta Provença siguèsse fragilisat.

La fauta a l’industriau alemand E.on, que vòu cremar entre 600 000 e un milien de tonas dins sa centrala termica de Gardana.

Lo bèu projèct qu’a autorisat l’Estat en 2011 ! Aquela centrala cremava de carbon per produrre d’electricitat. Mai lo carbon s’esplecha plus en França despuei la mitat deis annadas 90.

Puslèu que de far venir lo carbon d’Africa dau Sud, l’idèa siguèt de cremar de bòsc locau. Una idèa tant bèla que l’Estat a retengut lo projèct entre d’autres dins un apèu d’ofertas de la Comissien de Regulacien de l’Energia.

E se, ara, ajuda a la reconversien, deman cromparà lei kilòwatt oras mens car que totei leis autreis energias. Au totau, fa una ajuda de mai d’un milliard d’€.
 
Mai quid de totei leis autrei projècts endraiats au país per de collectivitats ? 55 ren qu’entre Liberon e Lura, onte l’equilibri economic ara es en dangier.

Coma trobar lei 6000 tonas de bòsc necessarias chasque an s’un industriau màger pesa sus lei pretz ?

Mai d’un elegit locau l’aurà pausada aquela questien, sus la plaça dau mercat de Gardana dimenja 5 d’octòbre. 400 personas l’i èron per dire son orror  dau projèct d’Eon.
 
Tala aquela elegida montanharda. « A Briançon, nòstre projèct comunau de remplaçar lo fiol per lo bòsc aviá d’avenir » qu’èra per una tiera de lotjaments sociaus. « Auriam creat aperaquí dètz emplecs…mai a l’ora d’ara, se lei fònts dau bòsc baissan alòr que lo pretz s’auça, tot aquò es plus tant segur ».
 
Meme leis autreis industriaus renan ara après E.on. Aqueu a fach la rampelada deis productors fin qu’ai Cevènas. Coma aquò an pitat l’amora sota lo nas ! d’autrei, coma lo papetier de Tarascon, Fibre Excellence, qu’ara fa venir sei ruscons dau Venezuela. 

« Existís pas pron de ressorças necessàrias per lei tres industriaus màgers que son Inova a Brinhòlas, E.on a Gardana e nosautres a Tarascon » qu’auriá dich lo delegat de Fibre Excellence au Rescòntre de la biomassa Proforbiomed, que s’èra debanat fòra de la pressa en junh 2014 a Marselha.

Coma farà E.on, dins aquelei condiciens, per se provesir ? « Passarà per d’intermediaris au nòstre, que seràn elei davant lei contestataires » romega un militant d’SOS Forêt Cévennes, vengut manifestar d’Ardecha.
 
« Son a prospectar fin qu’en Ariege » vendrà dire au micrò un boscatier privat tarnenc, qu’E.on furna tanben dins aqueu despartament .
 
Fa dètz ans èra una escomessa en Provença  d’avançar aquelei projècts de caudièras a bòsc, e lei colectivitats an butat a la ròda per lei far naisser. Un còp que tot s’es endraiat en bòna proximitat, vaquí qu’un projèct chausit a Paris, sostengut fèrme per lo prefèct de Regien au nòstre, risca d’espòutir l’òbra complida.
 
Ren d’estonant que lo conseilher municipau sestian d’opausicien, l’occitanista Arvei Guerrera, convidat a s’exprimir, digue : « se siam per leis energias renovelablas, aquelei se pòdon concebre qu’en proximitat, ‘mé la toca territoriala ; alòr qu’aqueu d’E.on es simplament escandalós, mòugut per lo solet profiech ».
 
Es pas lo solet de va dire, que mai que d’una comuna a deliberat còntra lo projèct d’aquel industriau gardanenc : lei Pargues naturaus regionaus de Liberon e Baronias, lei país d’Auta Provença, d’Assa-Verdon-Vaïre, nòu comunas deis Aups d’Auta Provença, e tota una tiera de comunautats de comunas, en generau aupencas.
 
Just ailà onte la màger part de toteis aquelei caudieras colectivas a bòsc an a pena crebat l’uòu que dejà pènsan a morir de fam…