La Regien Provença duèrbe un dispositiu d’ajudas ai productors independents de musica

Premiera en França a endraiar una politica d’ajuda ai musicas actualas en 1999, lo Consèu Regionau Provença Aups e Còsta d’Azur ven de renovelar una briga aquela politica.
 
« S’agIsse per nosautres d’assajar de gardar nòstreis artistas sus lo territòri, pusleu que de lei vèire s’enanar a París » qu’a sotalinhat Cristina Mirauchaux, la vici presidenta regionala delegada a la Cultura.
 
Se, d’un biais generau, lo budget ai musicas actualas rèsta au niveu de 3M€, en creissença leugiera de 50 000€ aperaquí, es lo dispositiu afortit que devriá donar l’astre, ai pichóneis estructuras, de pagar sei salariats, dins un monde artistic marcat per la precaritat.

Li aurà adonc una ajuda especifica au foncionament d’estructuras de produccien, dubèrta ai « pichóneis entrepresas qu’òbran a l’emergéncia d’artistas dau territòri e que s’investíssan tant dins la creacien artistica coma dins lei mejans de son desvolopament » que ditz lo dorsier publicat per Paca.

E aqueu de precisar que tot aquò es fach per « sostenir la presa de riscs ». Per aquò far la Regien vòu pereu « sostenir la massa salariala e lo cost de foncionament de l’estructura ».
 
En pratica aquela ajuda vendrà dau Consèu Artistic a la Creacien, onte s’acàmpan dos còups l’an una cinquantena de professionaus.

Es lo meme CAC que chasca annada estampa un CD dei musicas dichas « actualas », mescladas amé lei musicas, élei dichas « dau monde », onte trobam  lei tèxtes cantats en occitan, entre autres.
 
Mentre leis ajudas a la produccien, fau sinhalar lei bessonatges que seràn favorisats entre una estructura de produccien e dos luècs de programacien culturala. L’una d’aquélei salas serà siegue.

dins la ruralitat aluenchada, siegue dins de relargs urbans onte es mai dificile de prepausar d’espectacles musicaus.

S’esperlongaràn au mens un trimèstre aquéleis operaciens, e se podràn vèire ajudadas de 5 a 6000 €uròs « am’una clau qu’assegurarà que 80% seràn per l’artista » que díson lei servicis de dòna Mirauchaux.
 
Aquela ditz que vòu ajudar leis « independents » ; fau traduire leis estructuras, subretot associativas, qu’assàjan de desvelopar la creacien musicala fòra dau sistèmi dei majòrs.
 
La Regien ajuda ben lei Festivaus, per aperaquí 900k€, « que lei demandam de produrre d’artistas regionaus pereu » s’apara la delegada, ce que laissa lei dos tèrç dau budget ais àutreis entitats. 

Ecrit en provençal avec les suggestions de Reinat Toscano.