Egalitat salariala : Provençalas mai pagadas mai sovent solas

Una Lèi per punir leis entepressas que pratican l’escart de salaris entre òmes e frèmas, es ce qu’anoncia lo governament a l’occasien de la Jornada dei Dònas. Fin qu’a un per cent de la massa salariala deis entrepressas de mai de cinquanta salariats, vaquí que seriá lo castig , sota forma d’emenda.
 
E leis inspectors dau trabalh son encargats de cochar lei societats inegalitarias au nivèu salariau.
 
Problèma non dich, en 2018, li aurà pas mai de cinc pòstes d’inspector dau trabalh oberts en França entièra. Es lo nombre d’inspectors dau trabalh que se’n van a la retirada, pas mai.
 
Entre la logica budgetària de la descreissènça deis emplecs publics, e la logica egalitaria òmes-frèmas, li a coma una contradiccien, e l’efècte d’anoncia governementau l’ escondrà pas longtèmps.
 
D’autant mai que la problematica, complexa, es ben una realitat. En França leis òmes, a gaubi e ancienetat egala, ganhan mai d’un quart mai que lei dònas.
 
Un estùdi de l’INSEE de Franche Comté nos ditz que, en 2016, l’escart èra de 26% en Borgònha. Un bòn exemple, perqué justament es l’escart mejan en França exagonala.

Segon Mélanie Chassard e sei collègas, « leis escarts se cavan amé lo temps dei salariats ». Se pòu explicar per leis annadas  consacradas a educar leis enfants, amé un desbanament de carrièra qu’implica d’annadas de trabalh a temps parciau. « L’inegalitat es dins lei salaris, mai tanben dins lo desbanament de la vida professionala », que diguèt justament una representanta de la CGT a la radiò France-Culture lo 8 de març.
 
Es que, fòra dau ròtle que se cresián de tenir leis òmes, li es pas tant facile de poder, elei, trobar la compreneson de seis emplegaires per tanben trabalhar a temps parciau. E tota politica d’egalitat deuriá tenir en compte lo drech deis òmes a educar seis enfants.
 
En Provença, encara segon l’INSEE, l’escart òmes-frèmas es encara larg. Donia Essaleh e Gilles Fidani an mostrats, en 2017, que 71% dei frèmas provençalas trabalhan, còntre 80% deis òmes. E entre lei dos, l’escart salariau es de 27%. Pasmens, aquelei salaris dei frèmas son demieg lei mai auç « de França de Provincia », es a dire fòra de Paris.
 
Fau dire qu’es en Provença que se trobarà pereu la proporcien la mai auta dei familhas monòparentalas onte la frèma es cap de familha : 12,1% alòr qu’en França es de 10% en mejana.
 
Leis estudis, de’n pertot, fan vèire tanben que mai lo salari prepausat es aut, mai l’escart l’es tanben dins leis entrepressas. Adonc son lei mai generosas, valent a dire lei mai grandas, onte l’escart est lo mai important.
 
La TPE que viu dins la precaritat e consacra son temps a ganhar de mercats, ela, sembla pagar d’un biais mai egau òmes e frèmas, mai pas tant aut.