De flors « made in Var » per resistir au declin

Toótei leis indicators fan vèire que la populacien d’orticultors s’envielhisse. Mens d’esplechas, mens d’ectaras, mens de diversitat de flors e plantas… L’essenciau se tròba dins lo Var onte se prodúson premier de flors copadas, e onte se son debanadas fa gaire leis Assisas de l’Orticultura, a Tolon.
 
Lei professionaus demàndon un Plan d’Avenir per sa professien. Lei 1700 trabalhaires dins 800 esplechas s’amenúson a cha pauc alòr que – per un còup – se díson mai competitius que leis Olandés, amé sa chifra d’afaires de 150 M€ (en França per la soleta flor copada).

Sa premièra empacha es la pressien foncièra dins un despartament onte la vila crèisse totjorn que mai, premier en riba de mar, onte se tròbon la màger part dei fèrmas orticòlas. Lei professionaus fan coma pòdon en reaccien, e an dubèrt un « relarg aparat », pròche de Tolon, a La Crau : 12 ha qu’a crompat Tolon Provença Mediterranèia, l’intercomunalitat dau relarg de Tolon.
 
La vòlon reproductibla, aquela iniciativa, leis orticultors varès. Avís a tótei lei premiers cònsols que son pas lèsts de laissar manjar son espaci!
 
E, tot parier qu’amé lo vin o lo fromatge, vòlon una Indicacien Geografica Protegida (IGP) « Flors dau Var », am’ un reglament francés que rendriá obligatòri de mencionar se lei flors que se cròmpon son d’origina.

Ecrit avec les suggestions de Reinat Toscano selon les parlers varois.