D’abelhas a l’Ostau de Regien per aparar la diversitat

Dins l’entrelaç dei bornèus e dei escampadors de climatisacien de sa teulissa, l’Ostau de Regien assosta desenant una desena de bruscs . E lo mèu es chanut ! Pusleu fòrt en gost. Fai tres mes que lei quauquei 200 000 butinairitz « regionalas » voletan dei flors dei balcons an’aquelei dei falabreguiers , a tres quilomètres a l’entorn.
 
Per Enric Clement, lo president de l’Unien Nacionala de l’Apicultura Francesa, « es un paradòxe mai en vila, onte fai fa un pauc mai caud qu’a la campanha, e onte trobam pas toteis aquelei pesticides, lei floresons s’encadenan d’un biais continú. Resultat, leis abelhas vivon mai ben aquí que dins lei tèrras ».
 
Lo Consèu Regionau Provença Aups Còsta d’Azur vèn de signar la charta de partenariat d’aquela Unaf, per « Lo programme Abelha sentinèla de l’environament ». Vaquí la rason d’aquela installacien de bruscs au mitan de Marselha.

Amé lo Consèu Regionau, trobaram ren que l’Ostau Mediterranèa (30), e la Vila de Vitròlas (13). Ce qu’empacha pas d’autreis entitats de demandar a l’abelhaire de plantar cavilha  : lo Tecnopòle de l’Arbois, pròche d’Ais, o l’Ostau de Vila dau Martegue l’an dejà fach, fòra de l’Unaf.
 

L’abelha a besonh d’èstre protegida, que seis auvàris mancan pas. Lei pesticides dei tèrras lei afeblisson, lo manca de plueja a la prima tanben, «  mai lo màger es lo varroà, un acarian que s’espandis despuei 1982, e que pòu fondre  lei colonias » nos vèn Gerard Omelas, abelhaire pastre d’abelhas, e caminòt a Marselha.
 
Am’aquò, vaquí qu’arriba pereu lo cabridan asiatic, un terrible chaplaire d’abelhas. 
 
L’apicultura en Provença, es a l’ora d’ara 165 000 bruscs qu’esplechan aperaquí 4500 pastres d’abelhas, que 330 pasmens son ren que de mònò actius. Produson 2000 tonas de mèu chasque an, que per 60% son venduts directament a la practica.

« Mai tot aquò declina » ajusta Enric Clement ; « amé la desparicien massiva deis abelhas dins lo monde despuei vint ans ». La polinisacien, l’asseguran per aperaquí 35% dei plantas cultivadas, que sens elei serián pas tant divèrsas.
 
« En França, una estimacien ditz que serià 7 milliards d’abelhas l’an que mòron dau fach deis empachas de la « modernitat », dirà encara Enric Clement.
 
Lo sosten de la professien pèr totei lei mejans possibles seriá adonc pas mens qu’una ajuda a la diversitat dins nòstrei sietas.