Clara Ponsatí detinguda en Espanha puei liberada

Clara Ponsatí au país, puei arestada e detinguda, enfin liberada e tornada au Parlament Europenc… Un còp d’assai per testar la justicia espanhòla ?

Pasmens elegida au Parlament Europenc (Junts per Catalunya), adonc gausint de l’immunitat parlementari, Clara Ponsatí siguèt estada arrestada aqueu dimarç 28 de març per la policia autonomica de Catalonha, a Barcelona, alòr que tornava au país que se’n en èra exilhada a la fin de 2017, perseguida per la Justicia espanhòla.

La deputada independentista catalana tornèt au sieu per « plantar cara », es a dire tenir tèsta, an aqueu aparelh judiciari que condemna lo monde per seis idèas politicas, e son biais de lei prepausar.

Acusada de « desobeïssença » donava rendètz-vos a la pressa catalana a son sèti, lo collègi dei jornalistas de Catalonha, per una conferéncia de pressa. Un còp defòra, un responsable dei « mossos », la policia catalana, li fasiá menar davant un jutge, aqueu qu’a perseguit amb testarditge lei bailes catalans independentistas après son referendom dau premier d’octòbre de 2017.

Amb aquò, lo jutge èra davant un problèma : segur auriá vòugut encarcerar l’ex ministra catalana de l’Educacion, coma l’aviá fach per la màger part dau monde catalanista que siguèron presentat a son Tribunau Superior de Catalonha.

Mai teoricament aparada per son estatut d’immunitat parlementari, Clara Ponsatí deuriá pas èstre empresonada, e pas manco retenguda. Verai son immunitat l’apara de l’aparelh judiciari tant en Espanha coma dins lo rèsta de l’Union Europenca. E, circonstància agreujanta, dimècres 29 de març deuriá sèire au Parlament a Brusselas onte se debanarà una sesilha plenièra. Amb això, la Justicia espanhòla li auriá enebit d’exercir son mandat electiu : una causa grèva que podriá entraïnar una condamnacion per la Cort Europenca de Justicia.

Ja l’ex president de la Generalitat de Catalunya, Carles Puigdemont, eu tanben amenaçat d’èstre arestat se voliá tornar en Espanha, a demandat d’un biais oficiau a la presidenta dau Parlament Europenc, la Maltesa Roberta Metsola, de garantir lei drechs de sa collèga Clara Ponsatí. La deputada, verai pòu pas èstre detenguda a part s’es presa en flagrant delicte.

Amb aquò la Justicia espanhòla èra davant una escomessa  : menar Clara Ponsatí a Madrid per la presentar au jutge Llarena, De la Cort Suprema d'Espanha, ce qu’auriá dubert, per de mes e de mes, una batalha juridica europenca amb condamnacion de l’Espanha e afeblissament de sa notorietat democratica, o laissar liure la deputada e crear un precedent.

Quauquei jorns aperavans Marta Rovira, ela exilhada en Soïssa e encartada a l'Esquerra Republicana de Catalunya, aviá criticat lo referendom de 2017 qu'aviá pasmens sostengut a l'epòca. Un virafàcia viscut en Catalonha coma un biais d'escapar an un procès, per poder tornar au sieu sensa risc.

Fins finala es aquela solucion sàvi qu’a chausit la Justicia espanhòla, de liberar Clara Ponsatí. Interessant bòrd que farà un precedent… Lo còp venènt, Carles Puigdemont au sieu ?