A Gema lo Tè de l’Elefant capita sa Scop

Vaquí que s’endraïa la cooperativa dau Tè de l’Elefant…Aí ! Perdon, la ScopTi, per Societat Cooperativa Obriera Provençala dei Tès e Infusiens. L’anciana filiala dau grop internacionau Unilever, a Gema , tocant Aubanha, es ara independenta, bailèjada per seis emplegats, e va produrre amé de plantas francesas, levat dei tès que pòdon venir que de l’Orient.
 
A l’ora d’ara cerca encara per partida lei mejans de produrre e subretot de vendre. Per aquò, ScopTi acaba una operacien de finançament participatiu (crowdfunding).
 
Se lo monde podrà donar tre 10€, amé 35€ déja, auràn de boitas « collector » de tè, que rementaràn qu’aquela lucha per l’emplec provençau a capitat.
 
Aquela operacien, mandada en julhet, deviá lei menar 1336 contributors ‘mé la plataforma Ulule. Mai son ja quasi lo doble a prometre de pagar.
 
1336 serà lo nom de la linha de produchs que ScopTi vendrà. Es tanben lo nombre de jorns de lucha dei 180 salariats, per menar lo projèct.

Siguèt pas aisat. Unilever, grop internacionau que son sèti es en Olanda, voliá desplaçar la produccien en Belgica e en Polonha. En setembre 2011, lei licenciaments siguèron refusats per lei salariats, qu’ocupèron l’usina de Gema, maugrat la preséncia de nervis emplegats per Unilever. En 2012, Marselha Provença Metropòli, alòr bailèjada a gaucha, crompèt lo sèti, ce que donèt ais obriers pron de vòlha per afortir lo projèct e investir seis indemnitats per la maquinariá.
 
A l’ora d’ara, es de vendre la produccien l’ escomessa per ScopTi. Amé l’operacien de crowdfunding espèron lançar una plataforma internet per assegurar sei vendas internacionalas, e pereu se crompar un camion per lei vendas itinerantas.
 
L’aventura comença per de bòn per la còla d’obriers que volián ren que viure e trabalhar au país, mai que son devenguts a cha pauc un simbòu de l’acarnament locau facia a la mondialisacien.