Santa-Bauma sota totei leis angles

Es probable, en 2017 Provença comptarà un pargue naturau regionau de mai. Après Cairàs, Camarga, Leberon, Verdon, Preaups d’azur e Aupilhas, e esperant aqueu dei Baronias, Santa-Bauma s’ajustarà a la tiera d’espaci d’aparar sens restancar son desvolopament.
 
Lei comissions qu’alestísson l’afaire an de pan sus la canissa , e mai que d’un abitant conscient leis ajuda coma pòu.
 
Mai tótei va pòdon faire d’un biais tot simple, amé son aparelh de fòto.
 
Bòrd que l’associacion de prefiguracion dau pargue, que vòu faire la reclama dei riquessas d’aqueu mitan, baileja un concors de fotografias amé tres tèmas :
 
Lo paisatge, amé o sensa patrimòni bastit, lo bestium e lo plantum en vistas macròfotograficas, l’òme e son territòri son de fotografiar.
 
Es de remarcar que de tot biais lei participants de mens de 21 ans, que que siegue lo tèma, jogaran a despart dins la categoria « joines chanuts »
 
Lei clichats numerics son de mandar au sindicat mixte de prefiguracion avans lo 15 de junh : aude.mottiaux@pnr-saintebaume.fr
 
Adonc es lo moment de barrutlar de lòng e de caire , e de bas en aut dins la montanha mai meridionala de Provença, e d’i mitralhar tot ce que s’i remarca.

Ecrit avec les suggestions lexicales de Reinat Toscanò