Léo Lelée, pintre mouderne di tradicioun

La reneissènço d’oc a la virado di siècle de Mistral e de Valèri Bernard, a atriva de mounde fourastié , que fuguèron mai que d’un cop li meiour dis « artisto prouvençau ». Pèire II, efemère emperaire dóu Brasiu e pouèto, o Léo Lelée.
 
A-n-aquéu lou Musèu Chabaud de Gravesoun counscacro sa mostro, d’ivèr à la primo. Neissu Angevin, lou pintre venguè tardivamen en Arle, s’afouguè lèu pèr li Felibre, e pèr tout ce que voulien garda d’uno culturo que tóuti vesien coume amenaçado per la soucieta industrialo.
 
E pamens, es un pintre au « classicisme moudèrne », nous dis Monique Laïdi-Chabaud, la beilesso dóu musèu, que vèn en Prouvenço un cop « libera de tout academisme, e pulèu nouvatour ».
 
Un pintre de la lus, coumo tóutis aquéli qu’an cerca lou cèu de Prouvènço, que duerb uno paleto  «  a l’aboundànci e la diversita di coulour… escalustra tre soun premié countat en 1902, per l’intensita luminouso de la Prouvènço qu’a sachu amirablamen tradurre em’una paleto caietado » que dis encaro dono Chabaud.

Es mume un pintre de la « decoulouracioun » que tiro la lus dins li gris. Aqui soun biais ambigu de nous fa vèire uno Prouvènço que sa realita resquiho devers uno meno de visioun encantaresso.
 
Quand arribo en Prouvènço en 1902, après d’estùdi ben classi à Paris, Leo Lelée s’afougo per li gent dóu terraire, en particulié per si coustumo. Aquelo dóu vèsti de l’Arlatenco segur li remento li referènci à la « beuta dis Atenenco » e a tout ce que, per li nouvèu troubadour, remento li Grè ancian. Au vèsti tradiciounau li trobo uno sensualita que li courbo di cors nous fan bèn vèire sus la telo.
 
Lelée, pau coneigu vuei dins lou mounde, es pamens emblemati pèr lou mounde d’aqui, e es rare de pas retrouba si telo pèr dire lou païs d’entre Maiano e Camargo sènso fa vèire sei coulouracioun tant particuliero.
 
Eu, avié lou sentimen qu’après éu soun obro demourarié. L’escrivè d’aiours à-n-Augusto Chabaud : «  Sàbi qu’ai e qu’aurai d’ami, d’ami de iéu e de moun obro ».

Aquelo obro se pòu vèire au musèu de Gravesoun jusqu’au mes de jun. Intrado en semano de 10-12h e 13h30-18h30 d’outobre à mai, e tre jun tóuti li jour entre 10-12h e 13h30-18h30.
 
Musée de Région Auguste Chabaud – 41 cours National – 13690 Graveson – pres d’intrado 4 e 5€, redu à 2 e 2,50€. Visito, se rensigna au 04 90 90 53 02. 

Lire aussi : Louange du cyprès au Creddo de Graveson