E mai, serà au sèti actuau de Marselha Provença Metropòli, la comunautat urbana qu’acampa 33 ciutats, mai que deman serà ren qu’una cauquilha vueja.
Lo palau dau Faròt , onte s’acampan lei conselhiers metropolitan d’uei, devrà butar sei muralhas e espandir sei salas, bòrd que, se lei 120 elegits pòdon ara s’i assetar, deman que seràn 239, serà pas possible.
Pièger encara, lo palau bastit per Napoleon III a una polida vista sus la mar e lo Pòrt Vielh, sembla prestigiós, mai i anar autrament qu’amé la veitura es una escomessa .
Embarràs eternaus
Mai lo baile de la Metropòli, Jan-Claudi Gaudin, a son burèu au Palau dau Faròt, e tant pièger tant per l’actuau president de MPM, Guiu Tessier, pregat de suportar la situacien, coma per la presidenta dau País Sestian, Marisa Joissains-Masini, que rena segur de vèire que lo centralisme marselhés que denoncia es pereu simbolic.
