L’Esquèma despartamentau aupenc de Provença vòu anar davant

Lo Consèu Despartamentau deis Aups de Provença Auta convenciona amé d’associacions que fan mestier d’espandir la lenga nòstra. Arriba pas sovent aquò. Es per exemple lo cas amé l’Assoc (Animacion Escolaria d’Oc –IEO 04/05) per una virada annuala de teatre ais escòlas. E va fai encara per lo Comitat dei Fèstas Felibrenc, qu’organisa de cors de provençau.
 
Aquélei convencions de tres ans segur tranquilisan leis associatius, que pòdon desvolopar son projècte populari sensa se pausar a tot moment lo problèma de la subrevivença.
 
D’àutrei, coma nòstre jornau, o puslèu l’associacion que l’edita, se veson tambèn ajudats per donar ais autreis iniciativas la vesibilitat que fau dins un public mai larg en Provença e autre part.
 
La politica dau CD04 favorabla a l’ensenhament de la lenga nòstra e de la cultura que la lenga veïcula, es premier facha per faire intrar o tornar lo provençau e l’aupenc a l’escòla.
 
Una escomessa  ! Perqué fau cercar la bòna volontat de l’Educacion Nacionala…e que se pòu pas trobar a l’ora d’ara. Lo CD04 a estigançat en 2016-17 tota una campanha dins lei collègis… S’agissiá de crear una demanda. Un « flyer », coma díson, n’en fasiá la reclama.
 
Pecaire ! am’ un unic ensenhaire de segondari, de cors a Dinha e Manòsca, tres pas mai, e ren de ren dins leis escòlas dau premier degrà, a part d’animacions bailejadas per de mestressas retiradas, la demanda pòu ben crebar l’uòu , es pas ce que farà nomar d’ensenhaires dins leis Aups-d’Auta-Provença.
 

Pasmens, de monde fòrça volontaris, n’en trobam, lèsts a butar a la ròda, a preparar lo revèlh de la Bèla Educacion Nacionala au Bòsc Dormant… L’Espe, es a dire l’establiment de formacions dei mestres, coma lo centre documentari Canopee e la Mediatèca despartamentala son dins lei starting-blocks…Tótei an portat pèira an’una jornada d’esvelh a la lenga occitana, a l’ultime jorn de janvier.
 
A l’Espe fins qu’a quatre vint personas li son vengudas. Adonc se pòu dire qu’es pecat de vèire gastar una tant bèla vòlha.
 
D’aqueu temps l’assemblada despartamentala avançava sei reflexions. L’Esquèma Despartamentau « de valorisacion de la lenga e de la cultura provençala » siguèt lançat en decembre 2016. E lo CD04 li consacra mai de 20 000 € a l’ora d’ara.
 
Es aqueu que s’agirà de desvolopar lo 23 de mai dins un acamp de la Comission que li pòrta pèira : la vici presidenta dau Consèu Despartamentau, Natalia Ponce-Gassier, delegada a la lenga e cultura provençala, de foncionaris, de monde de l’Educacion Nacionala e tótei leis associacions que fan de cotria per mai partejar lenga e cultura d’aquéleis Aups de Provença.
 
Auràn de parlar d’anar mai luenh. En particulier s’agisse de mai faire conéisser son important trabalh, tant institucionau coma associatiu. Un portau dei sòcis e de seis iniciativas seriá en camin.
 
Per fin de mai partejar leis òbras e de pas tant demorar isolats deis àutrei mantenèires e promotors despartamentaus de la lenga. Es ce que nos díson lei bailes dau servici de la lenga d’aquela institucion : fau pas demorar chascun dins son recanton se volèm reüssir una politica favorabla a la lenga nòstra, mai au contrari anar de cotria .