Ges de PPP per leis escòlas de Marselha ?

« L’urgéncia es jamai que lo marrit pretexte per escondre lei retards amolonats ». D’una frasa la raportarèla dau Tribunau Admenistratiu de Marselha aurà ruinat leis arguments de la Vila de Marselha per faire construire o reviscolar 34 escòlas publicas per un miliard d’€.  La Vila aviá chausit en octòbre 2017 de passar par un Partenariat Public Privat per va faire. Es ce qu’an contestats tres ciutadans, e que vau uei a la Comuna de plaidejar au TA. La raportarèla publica, Lison Rigaud vèn de conselhar au tribunau de condemnar la metòda.
 
Lo PPP es segur un mejan d’anar lèu, amé d’investiments privats, mai que la colectivitat deurà pagar longtemps en remborsaments, e car. Un cònse que ne’n signa saup que seràn sei successors que deuràn assumir la despensa. Lo remborsament dau privat, per diferat que siegue, deu èstre mai fòrt qu’un remborsament abituau.
 
Lo defèndaire de l’associacien « Marselha còntre lei PPP » a sostengut amé succès que lo Mestritge d’Òbra Publica seriá fòrça mens cara. « Siam dins una situacien excepcionala » a argumentat l’advocat de la Vila. L’estat deis escòlas fa paur dins una ciutat onte la municipalitat que s’es consacrada a menar de projèts per atreure de monde dau defòra, s’es pas tant occupat de sei servicis publics o de l’abitat modest.