Erbas de fremas, un estagi especific a Sumena

Un estagi per tot saupre sus lei plantas qu’ajudan especificament lei fremas, li faliá pensar, e la botanista flama d’Aquò d’Aquí li a pensat, en collaboracion amé Clementina Blondon, « formatritz en escota benvolenta » qu’acompanha de monde en dòu.

Entre la tiera d’èrbas d’au nòstre que debanarà per leis estagiarias a Sumena (30) dau 13 au 15 dau mes, nos en a chausit tres, tres que fan de ben a diferents atges de la vida : fragosta, artemisa e oblon, o tantaravèu.

E a prepaus d’aquela ultima, que nos revèla una causa que leis òmes devon saupre : « lei grands beveires de bièrra desveloparàn de caracteristicas femeninas, coma mai de pitre e de ventre redon ». Es dich !

« La fragosta en tisana pòu reforçar l’uterus, adonc favorisar la liberacion d’ovules e de pèr ensin la fertilitat dei fremas, » ditz Florença. « Fau saupre qu’aquelei que chausisson d’ora la pilula, e fòrta en dòsi, pòdon puei patir d’una manca de fertilitat, bòrd qu’aquò simula la menopausa, adonc l’immobilitat deis ovules ; alòr la fragosta per elei pòu èstre ben utila. Mai encara, en gemmaterapia, es a dire amé lei borrons glicerinats, afavorisarà la regulacion dau cicle dei menstruacions ».

De l’artemisa, Florença Faure-Brac nos dirà que son amarum favorisa la purga dau fetge, adonc l’evacuacion de la bila e dau sang de l’uterus : « coma aquò refresca ben l’organisme bòrd que lucha còntra leis inflamacions. Lei fremas deurián apreciar perqué aquela particularitat afeblirà lei dolors dei menstruacions. » Mai mèfi ! Sabètz  benlèu, que d’artemisas n’i a doas : la comuna que fau utilisar, e una invasiva que caup de cetons que son un pauc toxics, adonc pòdon provocar de vertigi ! Per lei reconéisser, un libre serà necite, o d’anar a l’estagi ; mai ja devètz saupre que la comuna se crosa sus lei camins de montanha, e l’invasiva en ribas de rius.

Enfin, amé l’oblon, o tantaravèu, es lei fremas una briga pas tant joinas que se’n congostaràn : alòr au moment de la menopausa, la produccion d’estrogènes baissa e aquò destorba la regulacion ormonala… e lo sòm. « L’oblon refresca l’organisme, ansin favorisarà un retorn au sòm mai apasimat ». E la savia dei èrbas d’òc d’ajustar, una briga maliciosa : « es una cosina dau canabis ».

Stage plantes de femmes, à Sumène (30). Contact, renseignements, inscriptions : 07 69 30 41 87 ou florence.faurebrac@hotmail.fr
Si notre article est rédigé en occitan, la langue d'usage du stage sera le français. Inscrivez vous dès maintenant.