EELV anarà ais elecciens regionalas sensa lo PS

Ara es segur, leis ecologistas politics d’EELV (Euròpa Ecologia Lei Verds) marcharàn sensa lo PS en Provença, per leis elecciens regionalas dau mes de decembre.
 
E lo Partit Occitan que s’es alunhat d’aquela estrategia, serà pas sus sa tiera , onte se trobaràn d’ecologistas sensa partit, e de sòcis dau Partit de Gaucha.

A l’ora d’ara lo Partit Comunista, eu, resèrva encara sa responsa.
 
« Es un biais de luchar còntra la depolitisacien dins la societat, bòrd que nòstra estrategia es de batre lo rampèu dins la societat, de parlar ai gents » que nos ditz Sofia Camard, lo cap de lista EELV en Provença.
 
E que Manuel Valls arpateja per atrivar EELV la laissa de maubre. « aduse ren de noveu, e de tot biais nòstra estrategia, l’avèm decidada au mes de junh ! »
 
Per Arvei Guerrera, elegit am’EELV en 2010 a la Regien, es l’incompreneson.

« Nòstre bilanç de mandatura es aqueu d’una majoritat regionala de gaucha. E ara sacrifican tot aqueu trabalh an’una estrategia nacionala ! »

Segur que Sofia Camard vei pas ben lei causas dau mume biais. « Nòstre bilanç ? Lei ciutadans sabon pas qu’es nòstre, e mai que tot pensam que lo PS a dejà abandonat la Provença a la drecha. E aquò tre que Miqueu Vauzelle a abandonat la Regien a sa desfortuna ».
 
Se rementam qu’en janvier passat, lo president Vauzelle aviá anonciat que se presentariá pas « a l’eleccien de tròp », au moment que, dejà, lei sondatges disián que, per la gaucha, seriá fondut .
 
Despuei, la tiera PS a agut mai que d’una escòrna . Cristòu Castaner, pron valent mai sensa notorietat, s’es vist impausar dins lei Bocas-dau-Ròse Jan-David Ciot.

Mai aqueu cap de lista es mes en examen despuei 2013 per recelament de desvirament de fons publics.

Solament, sa presencia seriá la condicien per pas veire l’ancian president dau Consèu Generau, Jan-Novè Guerini, montar sa tiera pròpria, que vendriá espotir tot esper per la gaucha… Segur qu’am’aquelei combinasons, l’elegèire pòu se dire caucigat.

La gaucha en marrit estat, segur ! Mai que, dins lo contexte d’un FN qu’es pron enaurat ,  mai que d’un pensa que maugrat tot fau d’unitat. E Castaner, a l’ora d’ara, assaja d’escobar son entrepachós co-listier.
 
Es aquí qu’arriba Francesc-Miquèu Lambert. Lo deputat EELV dau 13… l’es plus.

« Quand, pauc avans l’acamp generau que deviá chausir, en junh, la linha de conducha, ai parlat d’acampar d’ecologistas d’autrei familhas » que nos ditz, « lo lendeman, èri forabandit per mèl… »
 
Lo deputat ecologista pensa pasmens recampar leis amics de Corina Lepage o de la liberala « blava » França Gamerre, ce qu’a poscut passar per una provocacien dins aqueu monde lèst a se charpinhar .
 
« Sai pas se Cristòu Castaner vòudriá me plaçar en cap de lista dau 13, es pas l’enjuec màger, mai siáu disponible, aquòs’s segur ».

D’autant mai que podriá rampelar leis ecologistas independents.
 
Son oposicien ‘mé la linha d’EELV, que ditz, ven d’un latz qu’aquela siguèt votada per una còla fòrça pichona : « pas mai de 120 personas » ; e d’un autre latz, que lei bailes dei Verds « fasián un preliminar d’exclure lo solet PS de tota aliança electorala ».

Un biais, segon eu, de pegar en Provença una estrategia verda nacionala.

« Es grèu, bòrd qu’ofriràn nòstra Regien a la drecha, e perqué non a son extrèma, per lei dètz ans a venir ! ».
 
Ben segur, es pas coma aquò que veson l’enjuec, lei mantenènts de la tiera EELV.

« Fau pas s’escondre darrier son det, am’una aliança ‘mé lo PS, segur que la mitat deis electors ecologistas serián demorats au sieu en plaça d’anar votar » pensa Crestian Desplats.
 
Capoulier dau grop Ecologista e Partit Occitan au Consèu Regionau, eu es pas Verd.

L’ancian baile dau Conservatòri de la Riba de Mar en Provença fai partida de la « societat civila », sus la tiera Camard.

Per eu, l’estrategia d’EELV « es justament un mejan de mobilisar l’electorat de gaucha ».
 
Au premier torn, puei totei a gaucha s’acamparián au segond.

De son costat, Arvei Guerrera se ditz espòutit. « Ce qu’a fach la majoritat de gaucha au Consèu Regionau, a pas de’n èstre vergonhósa : de durabilitat dins totei leis politicas, de l’agençament dau territòri a l’energia… vesi pas perqué tot aquò devriá se rompre per de resons de politica nacionala ».
 
Per eu, un solet resultat es d’esperar com’aquò : « l’arribada au poder regionau d’una drecha descomplexada am’una extrèma drecha, alòr qu’avèm besonh de perseguir l’òbra comuna : diversifiar l’economia, aculhir lo monde puslèu que de l’exclure… »
 
Sensa comptar qu’es leis elegits occitanistas que podrián se retrobar fòra d’una assemblada onte avián sostengut lo trabalh associatiu per la lenga d’òc coma jamai va siguèt aperavans.