Crozada d’Uei prepara son quatren opus

Lo dramaturge Patrick Hutchinson prepara a l’ora d’ara lo quatren opus de sa Crozada d’Uei, la saga endraiada fa nòuv ans per dire la crosada de còntra leis Albigés, am’un ressòn sistematic ai problematicas de la societat d’ara.
 
« La Cançon de la Crosada, qu’èra lo supòrt de tot lo projèt, s’arrèsta après lo sèti de Tolosa, perqué li a plus degun per ne’n finançar la redaccion. Mai pòdi poar dins lo fons de sirventés que s’escrivèron puei » que nos ditz a z’Ais.
 
Per aqueu quatren espectacle, que veirem benlèu en 2020, Patrick Hutchinson a chausit de parlar dau Franciscan Bernat Delicieux. L’òme acampava lei maucontents dau sistèma totalitari de l’Inquisicion, en particulier dins l’Albigés. En 1303 lo Rèi de França Felip Le Bel li donava rason.

« Es interessant que Bernat Delicieux provava au Rèi, sus pèças, que lei registres de l’Inquisicion èran plen de faus documents, qu’inventavan de perfiechs catars unicament per implicar de monde e li raubar tèrras e fortuna ». Un ressòn ancian dau debat actuau sus l’invencion dau catarisme per de marridei rasons.
 
Après ? Patrick Hutchinson saup pas. Parlar de l’eresia reformada ? De vèire…