La pastouralo Maurel mirau de la soucieta prouvençalo dóu tèms que Marto fielavo

La Pastouralo Maurel, qu'es acò ?
 

Es au 7 de la carriero Nau de Marsiho, que li avié lou sèti dóu ''Cercle Catouli Oubrié'' (beleja alor pèr l'Abat Julien) qu'en 1844 Antòni Maurel escri sa ''Pastouralo Maurel''. Dedins, en mai de Marìo, un soulet role de fremo li es juga ; l'epoco es pancaro pèr lou femelan au tiatre ! D'aquéu tèms, pas gaire de divertimen pèr lou pople, tambèn aquelo pèço, coumico e soulenno, fa flòri. De tiatre, de salo coumunalo, neisson ansin dins cado vilo, la magìo de Calèndo es aqui... Fau saché qu'en 1900, lei Bouco dóu Rove, leva de Marsiho, chifravon mai de quatre-cènts assouciacien pastouraliero que jugavon la Pastouralo Maurel...
 

La Pastouralo Maurel, es d'en proumié uno obro literàri redegido en vers, que lou tèmo repauso sus aquel liame inalterable entre lou mourtau e l'inmourtau : la neissènço de Nouastre-Segnour Jèsus-Crist.

 

La Pastouralo Maurel, es tambèn uno pèço de tiatre, en cinq ate, messo en scèno e jugado en Prouvènço en tèms Calendau. Escricho dins la richesso de lengo prouvençalo, dins la diversificacien d'aquéu parla naturau e poupulàri dei fidèu, des oubrié e païsan dóu siècle XIXen, la Pastouralo Maurel redauro lou blasoun d'aquélei que vivon souto lou mistrau, d'aquélei que parlon dei douas man, d'aquélei que la caro luse de sa coulour mieterrano, e tambèn d'aquélei que senton encaro lou brès de generacien d'àvi...

La Pastouralo Maurel, es subretout un tablèu de vido de quàuquei persounage-tipe dóu siècle XIXen. Tenènt comte dei coustumo mouralo de soun tèms, Maurel li pinto aqui touto uno tiero de mestié -au gaubi óublida perqué dispareissu- coumpli pèr de gènt que, cadun de soun biais, s'armouniso o s'afronto emé l'autre, pèr soun èime, sa vergougno, soun rebat uman, sei foundamen que s'escafon pas, seis estat d'amo, soun rèng souciau, seis ajust materiau e vestimentàri... Segur, cadun carrejo en éu uno feblesso davans l'aversita, mai n'en ressouarte uno energìo interiouro noun sóuçounado, uno forço mentalo ierarchisado, empausanto, quàsi majestuoua, pèr soun soulide estacamen à soun terraire, à sei racino, e pèr soun franc-parla. Fau si ramenta qu'à-n-aquelo epoco, la lengo prouvençalo subisse ja lei soubre-saut d'uno lènto sounnoulènci -Mistral a just quatorge an e pas un pèu au mentoun. Paradoussalamen, la Pastouralo Maurel, elo, trefoulisse mai que mai dins uno regien qu'à cha pau s'endustrialiso e... plan-panet si duerbe vers lou mounde...
 

La Pastouralo Maurel, es enfin la representacien articulado de la Nativeta, d'ente l'espetatour en sourtira afeta d'emoucien. Li descurbira, davans de decor encoulouri de lume e de joio, uno vertadiero crècho viéuto, qu'en soun dedins, ente d'umile santoun pourtaire de mouralo li prènon vido. A travers sei bèus e founs message, d'amista, d'amour -d'amour divin e d'amour pèr leis autrei- lei santoun viéu sabon perdouna, e nous revèlon alor l'escolo de la segoundo chanço...

Seguido de l'article la semano que vèn...