Un projèct sanhenc per donar enveja d’occitan remandat per causa de covid19

Serà que partida remandada, l’escòla “test” Toussaint Merle de La Sanha (83) aurà ben son temps d’assais de cultura e lenga d’òc, mai pas au mes de mai coma l’aviá previst la còla dau Ceucle Occitan de La Sanha.

“Tot èra lèst e ja eriam en trin de trabalhar lei partidas praticas quand es arribada la crisi dau coronavirús” nos vèn Patricia Jouve, fòrça activa au ceucle de promocion de lenga e cultura nòstra dins la vila de 65 000 abitants pròcha de Tolon.

Mai tranquilisa lo monde, lei parents d’escolans, lei mèstres e lei sòcis qu’an ja chifrat la causa : se farà, probablament a la rintrada de setembre, de vèire.

La chorma dau ceucle voliá prepausar una setmana de “seduccion” per la lenga nòstra. Faire plaser ai pichons d’aquela escòla dau quartier de Vinha Lònga, amé de còntes, de cants, de fabricacion d’instruments de musica basics amé de canissas, de danças, de juecs cantats… Un polit programa alestit encara fa una setmana per aqueu monde valent de la riba de mar.

Lo ceucle veniá d’acabar la presentacion d’una mòstra sus lei biais de dire, quand s’es organisat a La Sanha lo congrès dau Forum d’Òc, onte tota la dicha dau premier cònsol, Marc Vuillemot, s’es facha en provençau.

En seguida dau congrès dau Forum d’Òc, l’Associacion per l’Ensenhament de la Lenga d’Òc e lo cònse de la ciutat èran convenut de menar un projèct de reviscolament de la lenga a l’escòla. Segur lo Ceucle locau èra lo mai apte de li faire crebar l’uòu, amé l’ajuda d’ensenhaires d’òc dau pròche relarg.

Es que, amé tant de gaubi e de monde locau, fin qu’ara l’occitan aviá pas poscut intrar a l’escòla sanhenca...

De mèstres leis escòlas de La Sanha ne’n an, mai pas un de format, e totei sensa ges de formacion possibla dins l’encastre de l’Educacion Nacionala, jusqu’ara. Emai, lo monde coneis pas pron l’avantatge de viure vertadierament sa cultura.

En 2019 lo Rector d’Acadèmia de Niça aviá donat un tant d’oras per obrir un cors de lenga au licèu Beaussier. La professora de provençau de Sièis Forns, ciutat tocant La Sanha, l’i ensenhava despuei sièis ans e èra lèsta de trabalhar a Beaussier… Pecaire! Sensa informacion necessària, degun collegian s’èra marcat e lo principau aviá lèu renonciat.

Adonc, l’analisi locala es que fau crear un monde pertocat per la lenga e lo plaser de la parlar e de l’entendre. Impossible de sautar l’etapa de se crear un mitan favorable amé lei parents d’escolans.

La setmana de lenga d’òc a l’escòla testimòni deviá atubar la mecha. Lei broquetas rèstan lèstas per setembre...