Sòrte deis urnas una Provença contrastada e originala

Leis urnas èron encara caudas que dejà aviam una idèa de ce que pensa la Provença d’un biais politic. Una taca grisa cuèrbe la granda part dau país, levat de la riba de mar, puslèu blava.

Marine Le Pen es en tèsta dins la ruralitat, en generau, levat d’una bòna part deis Aups d’Auta Provença, onte mai o mens la gaucha resista. La drecha republicana coma se ditz, ela arriba en tèsta dins la màger part dei ciutats de la riba de mar.

Coma en França en generau, Benoît Hamon se tèn luenh en arrier.

La suspressa vèn puslèu de Jean-Luc Mélenchon, qu’arriba premier amé 24% a Marselha. Ja aviá capitat son acamp public sus lo Pòrt Vièlh, a la fin de mars dins aquela ciutat, onte lo premier arrondiment a votat per eu a 40%, am’una populacien en plena casuda sociala e un urbanisme que la buta defòra. Autre cas de leadership melanchonenc : Forcauquier. Lo baile de la ciutat es Christophe Castaner, raportaire de la Lèi Macron a l’Assemblada Nacionala, e sostèn solide dau candidat de En Marche.

 Emmanuel Macron, au còntra de sei resultats dins tota la França, arriba la màger part dau temps en tresena o quatrena posicien en Provença. 

Pes dei tradiciens politicas, mume recentas ? Es verai que lo FN en Provença a traucat tre 1989 au nòstre quand JM Le Pen aviá capitat un 30% ai Regionalas. Lo PC que siguèt fòrt dins una gròssa partida dei Bocas-dau-Ròse e deis Aups d’Auta Provença, garda benlèu de bèlei possibilitats, amé d’elegeires un temps esmarrats dau costat de la familha Le Pen, et que retrobam lo camin d’una gaucha que se fa vèire capabla de defendre un programa e de far vèire una revòuta còntra lo sistèma.
 
Cas quasi unic, Ais-de-Provença plaça en tèsta Fillon, seguit de Macron. Es que la vila es mai lèsta a reagir coma en França dau fach que sa populacien es mens establa que dins la màger part deis autrei vilas ?
 
Marine Le Pen arriba premiera dins de ciutats coma Arle, Aubanha, Lo Martegue , Aureson, Sisteron, Bolèna, Aurenja, Cavalhon e la quasi totalitat dei vilas mejanas, mai pas Avinhon onte Mélenchon la dobla. Lei ciutats mai grandas onte la populacien s’empaurís serián mai propiças a votar per una gaucha anti sistèma, alòr que lei ciutats mejanas, elei, ne’n tendrián mai per una drecha dura, que ela tambèn se ditz anti-sistèma ?

D’ensenhaments d’aqueu premier torn de Presidenciala, se faliá ne’n tirar quauqueis uns, podriam dire que la Provença rèsta la Provença… rebèla a ce qu’espèra lo poder centrau. Fariá mentir l’estatistica e rementar a la rigòla  leis instituts de sondagis. Enfin, rènde còmpte de la diversitat dei situaciens economicas, socialas e mentalas. Una ruralitat que vòta pas coma l’urbanitat, de grandei diferéncias entre lei ciutats de la riba de mar e lei rèire-país, benlèu una enveja de contrastes entre lei dos costas extrèms de l’escaquier politic.
 
De vèire coma lo segond torn se debanarà amé de diferéncias o non amé lo rèsta dau país. E mai que tot d’èstre a l’agachon dei legislativas que seguiràn, e que faràn vèire benlèu aquelei bèlei diferéncias dins la recomposicien politica francesa.