Scenariòs catastrofas per l’ennevament aupenc

Coma dejà l’an dich lei scientifiques de l’Agéncia de l’Aiga en França, la nèu tombarà pas tant coma avuei vèrs 2030-40. S’a l’ora d’ara lo rescaufament climatique se ves pas vertadierament, confondut amé lei variacions climaticas que d’una annada a l’autra fan que la nèu tomba mai o mens, un congrès internacionau nos ditz que dins 20 ans, dejà se veirà mai.
 
A l’International Snow Science Workshop (ISSW, Conferéncia Internacionala sus l’Estudi de la Nèu) que s’es acampat a Grenoble entre lo 21 e lo 25 d’octòbre 2013, 600 scientifiques an comentat lei resultats atenduts dau rescaufament dins leis Aups.

Gerarld Giraud, dau Centre d’Estudis de la Neu (de MeteoFrance) a poscut dire que « quasi 70 à 80% de nèu en mens son esperats a 1800 m » segon un scenariò dau projèct de recèrca Scampei, especialisat per lei relargs montanhencs.
 
« Per lo pièger scenariò, es aquò que nos ditz aquel estudi » . E mai qu’a partir de 3000 m sus leis ubacs, l’ennevament baissarà de 20 a 30% a l’orizont 2070-2100. Mai dins lo sud deis Aups, valent a dire nòstreis Aups occitanas, aquela baissa serà pusleu de 50 a 60%, segon Gerald Giraud.
 
Li aurà segur mens de mes de sason de nèu, e tota l’economia toristica ne’n serà segurament cascalhada.