Responsas evasivas a la Felco

Un mes après lo visiò-rescòntre entre lo premier ministre Jean Castex e lei representants de l’ensenhament associatiu en immersion, deguna avançada s’es facha.

Lo 7 d’octòbre èra la Federacion deis Ensenhaires de Lenga e Cultura d’Oc qu’èran au ministèri de l’Educacion, amb un document de 27 paginas per evocar totei lei questions que volián tractar Marie Jeanne Verny e Olivier Pasquetti, dins un rescòntre amé dos collaborators de Jean-Michel Blanquer.

D’aqueu rescòntre onte la Felco a demandat a l’Estat una politica d’ofèrta d’ensenhament e lei fonccionaris an dich que vòlián respondre an una demanda sociala solament quora s’exprima, fau sotalinhar que lo ministèri a encara donat ges de directiva ai cap d’establiments per faire de l’occitan una lenga ensenhada dins l’orari normau de totei leis cors.

S’agissiá per la Felco d’evocar, entre autres ponchs, l’article 7 de la Lèi Molac, ara promulgada manca l’ensenhamen immersiu dins lo sistèmi public. La Lèi precisava que « la lenga regionala es una matèria ensenhada dins l’encastre de l’orari normau deis escòlas… amé la tòca de [la] prepausar a totei leis escolans ».

Am’aquò la Lèi Molac deuriá signar la fin dei ensenhaments d’occitan ais « oras pebres », o a impausar aqueleis ensenhament a l’ora de manjar, o encara a sièis oras dau vespre, quora leis autreis escolans sòrton deis establiments. D'escomessa passariá a la normalitat.

Fau constatar que la responsa ministeriala siguèt de remandar tota decision sus aquò a la creacion dau Consèu nacionau dei lengas regionalas, anonciat per Jean Castex lo 15 de setembre, mai que resta, un mes après, una idèa e pas mai.