PSG pistonat, OM colhonat: "CLASSICO"

Lei partidas OM-PSG son estadas nomadas "classico" a l'eisèmple dei Barça-Real Madrid. Au darnier classico dau Parc des Princes per la Copa de la Liga agantèri una polida estomagada. A 29' èron 0-0 e l'OM fasié juec egau mé lei Parisencs. L'arbitre Antony Gautier, vestit de jaune dei caucetas a la camiseta, un sinhe, sublèt un penalti còntra l'OM per una fauta facha un boan mètre foara la linha dei 18. 

Promiera vergonha. Lo Marsilhés Fanni au nom predestinat siguèt foarabandit, dobla pena e segonda vergonha per lo fot professionau e sei 4 arbitres de mestier. Em'aquò lo PSG podié plus perdre. Meme lei jornalistas de la televisien publica an trovat l'arbitre « très sévère envers les Marseillais ». Li a pas que lei Marsilhés per èstre colhonats; considèri que leis espetators e lei telespetators son tamben estats colhonats.

Sieu segur que l'arbrite èra pas pagat per aquela marrida acien. Era un afaire de petòcha ; un arbitre, sènsa n'aguer conscienci, a paur de faire pena ai milardaris quataris mé son sublet. Podrié aguer d'influenci sus l'avenir de son mestier d'arbitre e sa presenci en promiera divisien. Aquò es pas una especificitat dau jaune Gautier. Dempuei l'an pebre si siam avisats que lei gròsseis equipas dau championat èron favorisadas mé l'arbitragi a regard dei mesquins dei pichins budgets que fan l'anar-venir entre la promiera e la segonda divisien.