Massilia Sound System lo film es montat

« Siam enfin sortits de la bauma onte eriam despuei tres mes ! »
 
Amé lo montaire Franck Littot, ja ai manetas per lo filme Afrikaïoli, lo cineasta Christian Philibert acaba lo montatge de son documentari sus lo grope Massilia Sound System. « Sabèm plus ce qu’es jorn, nuèch e dimenjadas. Eriam aclapats d’òbras . »
 
L’òbra, d’aperaquí una ora e mièg, n’es pas per aquò terminada. « Li aurà de modificaciens, que siam a far vèire lo resultat en pichóns comitats a l’ora d’ara, e qu’entendi lei criticas » nos ditz Christian Philibert.
 
Regreta qu’a degut sarrar l’angle de son film, maugrat la riquessa de la vida d’aqueu grope trobador emblematic marselhés, « mai es l’existéncia d’archius que, mai que d’un còup, a permés de parlar o non de tau o tal aspècte, de tau o tau personatge… »
 
Per eu, l’ escomessa es ben de lo presentar au public regionau avans l’estiu. De projecciens son organizadas per lei actors principaus, lei sòcis dau MSS, puei per lei donators màgers de l’operacien de finançament participatiu qu’an donats de mejans au realisator.

« En veritat, se, ieu, siáu totjorn maucontent de meis òbras, que tròbi jamai pron desbocadas », qu’ ajusta , « estò còup va pòdi dire, siáu fièr qu’existisse lo film, e que podrà èstre vist dins lei temps ».
 
Christian Philibert nos confirma qu’aurà tocat ges d’ajudas per va faire, tant dau Centre Nacionau de la Cinematografia coma de la Regien Provença.

Per eu, li aurà doás fonts màgers de mejans financiers. Premier lei 38 000 € dau crowdfunding qu’an organizat lei Films d’Espigoule lo mes passat, puei leis intradas dei sesilhas que seràn organizadas en Provença, un pauc d’en pertot.
 
Am’Afrikaïoli, son òbra precedenta, li aviá agut de sesilhas en plen èr qu’acampèron jusqu’à uech cents espectators.

Espèra qu’amé l’onda de simpatias qu’a endraiat, aqueu film encaparà encar mai.

Article écrit avec les suggestions lexicales de Reinat Toscano