partager
L’associacion per la Calandreta de Niça a comunicat via son facebook que la premiera rintrada se fariá ben en setembre de 2021. Lo project se ne’n parlava despuei quauquei mes, e son animator Cristòu Daurore estima d’èstre pron avançat per ne’n dire un pauc mai.
Per una calandreta nòva quauquei condicions son necitas : de parents volontàris segur, un locau ai nòrmas, e d’ensenhaires. “Per lo locau podèm pas ne’n dire de tròp perqué se negocia lo prètz e lei condicions a l’ora d’ara”, nos vèn Cristòu Daurore, “ mai serà a Niça Vila, bòrd que l’assai precedent, a l’auba deis annadas 2000, a Drap, pausava tot plen de problèmas d’aluenchament”.
Actualament liberat d’una part de son trabalh d’animator, lo meme assegurariá la direccion de l’establiment de crear. De saupre qu’a trabalhat dins l’Educacion Nacionala e qu’aquò vendrà una condicion per lo pòste, amé de nòvas disposicions impausadas per l’Estat.
Lo meme Estat, dins la dralha de la lèi sus lo “separatisme” aigarà d’un autre costat la calandreta
de parents que, autrament, aurián ensenhat a seis enfants a l’ostau. “Sabèm ja qu’aurem pron d’escolans tre la premiera rintrada, mai segur son nombre dependrà mai de la susfaça dau locau que de tot autre critèri”. Fau au mens 4 m2 per escolan dins una sala de classa, sensa comptar leis annèxes.
Au capítol dei mejans, un partenariat amé lo club de fotbal OGC Niça e lo sosten de l’artista Ben deuriá entraïnar d’autres donators, segon Cristòu Daurore. L'escòla portarà lo nom dau cantaire Mauris Sgaravizzi.
Per tot contact mailto:cyriloc06@yahoo.fr
Un solet candidat au capes d’occitan e degun admés
