Leis incèndis provençaus tanben un drama de la polucien de l’èr

L’incèndi qu’a devastat lo relarg niçart lo 17 de julhet a acampat mai de 400 pompiers, e cremat de desenas d’ectaras de bòscs ; mai a tanben cargat l’èr de pòussas finas a un nivèu important. Fins qu’a 300 µg/m3 au centre de Niça, e encara  jusc’a 94µg lo 18 au matin a l’aeropòrt. A passat l’òsca  reglementàri de 50 µg/m3 siguèt despassat dins la jornada dau 17, ce qu’arriba pas sovent.
 
A costat de Marselha, lo fuec qu’a manjat mai de cinc cents ectaras de bòscs dins lo relarg de Sant-Canat, eu a pas provocat tant de concentracien de pòussas . Pasmens a esperlongat seis efècts fin qu’au centre de Marselha, a cinquanta quilomètres dei flamas, onte Air PACA a mesurat quasi 50µg/m3 d’aquelei pòussas finas, pròche dau palais Longchamp.
 
Aquelei pòussas, va sabèm, son d’una quimia complèxa, e tota mena de metaus lords o d’autrei moleculas quimicas pòdon s’i pegar avans que d’intrar dins nòstreis organisms.

Ja l’an passat, a l’escasença dau grand fuec dau 10 d’avost entre Ronhac e Vitròlas, Air PACA aviá mesurat l’efèct d’aquela pollucien. « Li a agut una poncha » lo 10 d’avost 2016 en causa dei bòscs cremats, coma nòstreis aparelhs an poscut lo far veire » se rementa Boualem Mesbah, responsable deis estudis d’aquela associacien de mesuras de l’èr.
 
Air Paca s’es dotada despuei un an d’aquelei aparelhs, lei ACSM, que pòdon destriar la part dau bòsc cremat d’aquela dei veituras. « Aviam pas alòr pensat ai fuecs de còlas , mai voliam mesurar la part dei fuecs de chaminèia, coma dei residús verds, que vesèm totjorn que mai qu’es un vertadier problèma de santat publica » ajusta l’engenhaire.