Lei tabucans plantaràn pas cavilha est’estiu a Sant-Chamàs

La suspressa siguèt marrida per leis aparaires de la fauna de la Mar de Bèrra, quand an descubèrt que lei clausuras d’aparament dei tabucans nanets èran estadas raubadas. «  Es lo segond còup qu’arriba en 2013, e just au moment de sa nidificacien. Es un desastre » que nos dison au Conservatòri d’Espacis Naturaus, que baileja l’aparament de l’espècia.
 
Aqueleis auceus fan son nis dins un endrech bèn particulier, lo cordon de cauquilhas en riba de la Mar de Bèrra, que fa de bèlei plajas a Sant-Chamàs, sus un terrenc que li dison « Les Palous ».
 
Au tabucan li agrada de cavar sus lei plajas per far son nis e fa quauqueis annadas qu’assaja, en riba de la Mar de Bèrra, pèira a pèira de far clapier. Mai li a mai que mai de monde que passa sus aqueu terren, e lei chins cochan l’auceu. Es per aquò que lo CEN aviá embarrat l’endrech.

Aquelei clausuras son segur pausadas per empachar lo monde de passejar aquí au moment que lei poletons creban l’uòu, entre abriu e julhet. Es adonc tota la populacien, fèbla, de la Mar de Bèrra que serà pertocada.
 
D’un autre latz, se lo CEN ditz que la « majoritat deis usatgiers èron tant d’accòrd coma la Comuna » sus aquela barradura, lo raubament pausa la questien dau consensus e dau mòde de decisien per sanctuarisar una tèrra. 
 
Lo tabucan nanet es rare, 1700 parèus en França, dètz sur lei Palous de Sant-Chamàs ; l’espècia es aparada, sus la tiera roja mondiala de l’IUCN (Unien Internacionala per la Conservacien de la Natura). Son declin es lentàs mai segur.