Legislativas en Provença : cu defendriá la lenga nòstra a l’Assemblada Nacionala ?

Se l’ensems dei uech deputats elegits dins Var son a l’UMP, se dins la Vauclusa l’UMP parteja lei sètis ambé lo FN (Carpentras) e son avatar de la Liga dau Sud de Jaque Bompard a Aurenja, Aups e Bocas dau Ròse an vist dimenche una ondeta ròsa .

Dins leis Aups es l’arribada de Cristòu Castaner, lo cònse de Forcauquier e ex daufin de Michèu Vauzelle, es elegit, coma Gilbert Sauvan a Sisteron, onte se tornèt pas presentar l’UMP Spagnou. Dins lo 13, uech deputats socialistas son elegits o mai elegits.

Fau senhalar la sortida de la deputada Marisa Joissains per lo cònse dau Puech Santa Reparada, Jan David Ciot. Es de sotalinhar tanben que se lo retirament dau candidat Rotland Chassain en Arle deviá ajudar un candidat dau FN, fin finala aquò capitèt pas, e Michèu Vauzelle siguèt  mai elegit, mai just just.

Enfin, la soleta ministra dei Bocas dau Ròse, Maria-Arleta Carlotti, a batut a Marselha Renaud Muselier, qu’escondèt pas son ambicien de devenir premier cònse d’aquela ciutat.

Es de se demandar, entr’autrei questiens, coma aqueleis elegits seràn dispausats a ajudar una Lèi per la lenga d’òc, e la sinhatura per la França de la Charta Europenca dei Lengas lei Mens Parladas ? Andrieu Aschiéri (EELV) francament favorable, siguèt pas elegit a Mouans Sartoux, pròche de Niça. E fau senhalar l’eleccien entre Ais e Marselha de l’ecologista Frances Michèu Lambert. Se pòu pensar que sariá lest d’ajudar. De Patric Menucci, se ditz tanben qu’eu sariá lèst de butar a la ròda.
 
Ambé l’UMP Bernat Reyniès, cònse de Casteureinard, coma ambé lo PS Enric Jibrayel dins lei quartiers Nòrd de Marselha, tenèm d’afogats d’una còla de provençalistas estrechs que pantaian de separar lo provençau de l’ensems dei varietats de la lenga occitana. Es tot parier ambé Michèu Vauzelle, alòr que Crestian Kert, l’UMP dau Sud Sestian, reelegit just just, a totjorn assajat de faire lei doas mans entre aquelei provençalistas e leis occitanistas.

Lei movaments regionalistas trobaràn pas segurament d’afogats lèsts de defendre la lenga a l’Assemblada Nacionala. Leis associaciens an jusqu’a 2017 per lei convertir.
 
Deja quauqueis uns se son engatjats. Se pòu legir sus lo site web de l’Associacien per l’Ensenhament de la Lenga d’Òc qu’una vintena de candidats avián responduts a un questionari sus l’ensenhament de la lenga a l’escòla. Au mens tres siguèron elegits :
 
Joèu Giraud (PRG), a Briançon, se dis d’accòrd per dire que l’ensenhament de la lenga es un « dever nacionau », qu’un ensenhament permanent dins 30% deis escòlas es necessàri, e que i a bèn, coma lo disiá Mistral « una lenga d’òc » ambe sei varietats, en luec d'una atomisacien "de lengas d'Oc", coma quauqueis uns l'aparan.
 
Guiu Teissier (UMP) elegit a Marselha, e Frances Lambert (EELV) a Boc-Bèl-Er, respondiguèron tot parier.