La clau europenca l’avètz en pòcha dòna Merkel

Angela Merkel s’es entornada dau darrier G7, en Italia, fòrça amara. Donald Trump li repròcha de vendre mai ais USA que ce que leis USA pòdon vendre a l’Alemanha. Se ditz pereu deçaupuda que leis Americans vògon pas reafiermar que, en cas d’agressien, volarián au secors deis Europencs, coma totjorn aviam pensat que l’OTAN va fariá.

La premiera Alemanda s’es planhuda dau biais novèu deis USA, es a dire d’aqueu de son president. Pinta de bièra en man, davant 2500 afogats de son partit, la CDU e son parier bavarenc, la CSU, s’es avisada tanben que, lèu, l’Union Europenca deurà se passar dei Britanics.
 
Adonc, la conclusion s’impausariá : dins un monde plen de dangiers, am’una Russia agressiva, un pròche Orient e una Africa lèstas a escampar totei sei paures plen d’espèrs sus nòstrei ribas de mar, e una Anglatèrra que se rementa qu’es una illa, « fau afortir l’Euròpa ! » Eurêka…
 
L’Alemanha s’es aplicada vaquí dètz ans lei recèptas que lo govèrn francès e aquelei d’autrei país pantaian uei de s’aplicar : una deregulacien sociala fonsa, e una libertat dau marcat coma jamai.
 
Segur que lei produccions alemandas ara se vendan mai un pauc de’n pertot.
 
En 2016 la balança comerciala alemanda a vist sei despensas au mai bas, e sei recèptas tot en aut, coma jamai. Un recòrd ! Un subre comerciau de 257 miliards de dollars. Es a raprochar d’aqueu de la China e de sa creissènça a dos chifras, que siguèt jamai que de 293 miliards de $ am’una populacion quinge còps mai importanta.
 
Am’aquela situacien faudriá donc refortir lei liames entre Europencs. D’Europencs que sofron totei mai o mens. Un tèrç de la joinessa espanhòla a passat lei dètz darniereis annadas a fugir son país per trabalhar, en America o autra part, o a vivassar au chaumatge o dins d’emplecs au negre. Leis Italians vivon a pena mai ben. E que dire dei Grècs 
 
Fa pas manco una setmana que leis Europencs e lo FMI an convidat lo ministre grèc dei finanças, Euclide Tsakalotos, a li dire coma pensava amaigrir un còp de mai son budget public, e remborsar sei creditors.
 
Lei Grècs, elei, pèr un còp, an rebecat . Tant que leis Europencs e lo gendarma financier mondiau li auràn pas dich coma pensan d’aleujar son deute, leis Elenas dison que pagaràn ren.
 
Vaquí leis Europencs que nos faudriá refortir sei liames amé nòstre bèu continent politic, dòna Merkel. Sei pòchas, pòdon ben lei devirar, ai Grècs, son vuejas. Lei belòias de familhas, leis an ja vendudas. Son pòrt màger, aqueu dau Pireu, es ja ai mans dei Chinés, e lei Russes son a durbir lei braç per ne’n faire d’aligats.
 
E s’entènde ben. Uei, lei Grècs mejans, quand agantan un cancèr, an plus qu’a se laissar morir. Es coma aquò que se pòu tradurre dins la vida de chasque jorn, l’aleujament constrench dei finanças publicas au sieu.
 
E la reson imediata d’aquela situacien, la fau demandar a vòstre ministre dei finanças, Wolfgang Schäuble, l’intractable. Pèr la bèla reson qu’a l’autona venent, leis eleccions generalas alemandas, aqueu pensa que li ganharètz, dòna Merkel, que se mantenètz lei mans au còle dei Grècs.
 
La solidaritat deis Europencs, segur, sembla a l’ora d’ara una bèla escomessa , una necessitat. Encara vos fau saupre que podrà se refortir qu’a la condicion que leis Europencs va vògan.
 
E la clau d’aquela volontat, l’avètz, vos, en pòcha.