En temps de terrorisme, lei tèrras mai tranquilas e lei ciutats plenas d’ansia

Rumors e faussei novèlas son viscudas coma une vertadièra empacha au travalh de la polícia, per protegir de centenas de luecs de natura diferenta, segon lo prefect dei Bocas-dau-Ròse.
 
Esteve Bouillon parla de « politicas comercialas desaviadas » per qualifiar lei apèus que, fa pauc, avisavan la policia « d’atemptats imminents ». Aquelei èron de purs fantasmes, mai  devián menar a evacuar de centres comerciaus per ren…
 
La rumor s’es espandida mai que d’un còp. « Jamai dins lei pichonei comunas, totjorn dins lei grandas », per FaceBook en particulier. « Siam a ne’n cercar l’origina e lei autors » avisa lo prefèct. Es que la mobilisacien dei policiers  es un afaire seriós, e s’agis pas de lei alassar per faire concurréncia d’un biais tan originau…
 
Tot parier, leis atacas islamofobas o antisemitas son vistas coma seriosas, que devon totjorn èstre verificadas per evitar un  ambient de paur permanenta. « Aquelei que se son debanadas dimècres son pas lo rebat dau climat a Marselha » segon lo prefèct. Lei agressors ne'n son pas encara arestats. E lo prefèct a dich que lo ministre de l’Interior, Bernat Cazeneuve, li aviá demandat de lei retrobar. Per aqueu, una possibla tensien etnicò-religiosa adonc sembla pas improbabla.

L'afaire dau professor de l'escòla Yavné, segon de testimònis, s'èra debanat davans de monde, dins lei begudas dau quartier Sant-Just, d'onte degun a vòugut o aujar intervenir. 

E la plaça Castellana, au mitan de la ciutat, onte s’es facha l’agressien d’una musulmana nafrada per cutter, dimècres d’après-dinnada, es desprovesida de tota camera. E per lo moment escapa a la polícia l’agressor.
 
Lo prefèct a encara dich que lei perquisiciens que mèna aquela polícia, despuei que l’estat d’urgènci es desclarat, li a menat sièis armas. « Tres son longas » ditz lo prefèct de policia, Laurenç Nunez. Mai ges de Kalachnikòv. Au revenge, fòrça canabis siguèt trobat am’aquelei furn de nuech.
 
D’armas de fuec, son lei polícias municipalas que ne’n demandan fòrça, amé de corsets para-balas. « Mai que d’una centena d’armas èron estadas provesidas, en particulier dins lei pichonei comunas » sotalinha encara Laurenç Nunez. E aqueu ajusta qu’a « Marselha, lei policiers comunaus devràn seguir una formacien especiala ».Li faràn portar d’armas a partir de janvier 2016.

Se una centena de personas son déjà  assinhadas a son ostau dins aquelei Bocas dau Ròse, lei premiers cònsols se dison inquiets. Mai ren que dins lei ciutats d’importancia, onte se demandan ce que se debanarà au moment dei fèstas calendalas, amé de carrieras clafidas de monde.
 
Mai sus un ponch, lo prefèct vòu rassegurar : Niça, ponchada coma vila particularament sosta de jiadistas, aquò seriá tanben una rumor. « Oblidatz pas que, fau pauc de jorns, es a Tolon qu’avem arestats un joine qu’alestissiá un atemptat. »
 
D’aqueu ponch de vista, la falha entre territòris provençaus seriá pas entre Marselha e Niça, mai ben entre lei tèrras  e lei grandei ciutats. Mai de tranquilitat ai premièras, mai d’ansia ai segondas.