L’Acadèmi Prouvençalo de Cano vitimo d’un cambrioulage

Quino marrido souspresso lou quinge d’abriéu au matin, de descubri lou loucau coumpletamen saqueja e lou materiau siegue roumpu siegue rauba ! “Raubo, fourco, fouit, voulame siguèron rauba o foundu lou materiau de sounourisacioun e mai que d’un estrumen de musico tambèn” nous vèn Louis Tighilt, sòci de l’Acadèmi Prouvençalo de Cano, un d’entre li mai ancian groupe foulclouri de Prouvènço.

Es tout lou plan-pè d’un inmoble canen presta eis assouciacioun pèr la Coumuno qu’a pati d’un cambrioulage e fouarço materiau infourmati a despareissu ; en mai d’acò li raubaire an saqueja tout ce que podien pas empourta.

Alor, l’Acadèmi demando soulidarita is àutri groupe folc e s’adreisso au mounde pèr recampa lou mai que sera poussible d’aquélis elemen de decor e d’eisino païsano que fan servi pèr si prestacioun publico. Li danso en vèsti li poudrien pas presenta sènso acò.

Segur d’estrumen de musico li mancon tambèn : “timbaloun, galoubet, dous tambourin e de bachas que nous an rauba” se lamento Louis Tighilt, “que podien presta au mounde que pòu pas se li croumpa. Per astre li mai venerable estrumen aro son au musèu”.

“Fasen apèu en tóuti per nous ajuda avans que recoumence la sasoun” qu’acabo.

L’Acadèmi Prouvençalo de Cano siguè foundado per Victor Tuby en 1919, e a coumta entre àutri glòri lou tambourinaire Maria, que chascun i’a toujour di “Moussu Maria”, au recouide dis annado vint-trento.

De countata au 06 68 41 56 96 e tighiltlouis@gmail.com