A Lienemann li agrada pas que se parle còrse a l’Assemblada de Còrsa

Curiosa costuma en França que de faire un procès en plaça de debatre. Per de personatges politics es estrani. En aquela matièra podèm donar la palma a la senatritz parisenca PS Marie-Noëlle Lienemann.
 
Segur, despuei lei declaraciens de Jean-Guy Talamoni per l’obertura de la sessien de l’Assemblada de Corsega, li a agut leis eveniments d’Ajaccio, onte de pompiers siguèron nafrats per de monde encagolats, puei lei passa carriera au perfum xenofòb. Devriá donar un relèu novèu a la garrolha entre lei dos personatges politics.
 
Adonc, a pena acabadas leis elecciens regionalas, marcadas per lo bomb dau FN en França, vaquí que l’anciana ministra dau lotjament de Lionel Jospin vòu de sanciens dau governament per lo novèu president de l’Assemblada Territoriala de Corsega, Jean-Guy Talamoni. 

Li repròcha pas ce qu’a dich au moment de son premier discors, bòrd qu’entende pas lo còrse, MN Lienemann. Ce que passa pas per la senatritz, es que la dicha siguèt facha dins aquela lenga.
 

« Delà dau non-respect de la Lèi (lo francés lenga de la Republica, Ndlr), que sembla pas de tafurar lo novèu president, aquela actitud es prejudiciabla au principi d’egalitat : es evident que l’ensems deis abitants de Corsega mestrsejon pas aquela lenga regionala e que pòdon pas entendre lei prepaus de son elegit ».
 
E de demandar au governament de prene de mesuras, bòrd que per l’elegida parisenca, « an un moment que la defensa dei principis e valors de la Republica s’impausa en totei ».
 
Mesclar dins la muma saussa un elegit regularament elegit per lo pòple e lei tuaires de Daech mandats per d’imams forestiers es segur una bèla cagada. Mai es de se demandar perqué la senatritz s’es pas presentada ais elecciens en Corsega, per faire valer seis arguments.
 
Auriá alòr poscut entendre lei resons que fan que lei Còrses pòdon pas totei entendre lo còrse.  Per fauta de co-oficialitat dei doas lengas, que leis amics socialistas de l’anciana ministra an totjorn refusat ai Còrses.