A Arle Convivència corre après lei jorns

Despuei 16 annadas lo festenau arlatenc Convivéncia prepausa un rescòntre amé d’artistas e de preocupacions socialas que laissan pas indiferent.
 
Pasmens, la marèa bassa dei subvencions regionalas li laissan que quatre jorns possibles sus lei sèt dau Festenau abituau. La solucion ? un finançament de cotria amé la platafòrma Provence Booster.

De que ne'n ditz son fondator ?
 
Joan Colomina, onte ne’n siás d’aqueu festenau ?
 
D’un caire. la subvencion publica d’aqueu festenau a gràtis a tombat de 30%, e es lo Consèu Regionau premier que l’a facha baissar. Puei lo retard per votar aquela ajuda reducha nos a constrenchs a « menjar » manjar ? nòstra tresorariá. Ara ne’n siam a saupre que podèm pagar quatre jorns d’un festenau que ne’n fa sèt.

Lo budget Cultura de la Region creisse pasmens de 9% en 2016.
 
Es d’estructuras que ne’n an pas tant de besonh que profiechan de : lei grands festenaus provençaus tau coma aquelei  d’Avinhon o d’Ais. Per leis autres, li a qu’a bramar famina, que que siegue l’interès.
 
Vòstra reaccion es de cercar lei dardenas que mancan ?
 
Segur, e am‘una operacion de finançament participatiu, un « de cotria » se volètz. A dos nivèus : s’agantam 3500 € podrem organisar lo cinquen jorn dau festenau, e amé 6500 € farem lo sieisen.
 
Avètz pas chausit una platafòrma celebrissima tala coma KissKissBankBank o Ulule. Perqué ?
 
Voliam evitar leis emanacions de grandei societats bòrd que nòstre festenau es un afaire associatiu e que fèm ges de profiech. D’un autre caire, Provence Booster es regionau, nosautres pereu. Enfin, sa prepausicion per valorisar nòstra escomessa, l’avèm trobada flama.

Convivéncia es de desenas d’artistas de la Musica dau Monde que son venguts aquí cantar. Se deuriatz ne’n rementar que dos d’aquelei moments ?
 
Sabètz que Convivéncia èra un concèrt a miegjorn pròche d’un discari, puei un rescòntre amé l’artista o una problematica.

Avèm chanjat aquò que perqué avèm agut l’astre de trobar una sala granda.

Alòr, maugrat que totei fuguèron agradius, ieu me rementi d’en premier de la venguda de Claudi Marti e dau debat qu’avèm endraiat en 2005 sus lo tèma « viure e trabalhar au país ».

Puei d’un grope de tria que nos èra vengut dau Nòrd, HK et les Saltimbank, que cantavan de tèxtes de revòutas trobats dins sa ciutat dau relarg de Lille. Fòrts !