Serada electrò, serada trad, serada occitana ? L’IEO 31 vos prepausa los 3 en 1 : una serada electrò-trad occitana e tot aquò dins un encastre excepcional : l’antic siti arqueologic de las Arenas Romanas de Tolosa.

Après la capitada del Fest’Arenas al mes d’octobre de 2022, consacrat als instruments tradicionals occitans (bodegas, crabas, autbòi), amb de passacarrièras e la magica Vespa Cogourdon Orchestra, l’IEO 31 tornarà investir aquel luòc unic e particular lo 1er de julhet de 2023.
Novèl eveniment, novèla tematica : electrò-trad. Mas qu’es aquò, electrò-trad ? Es a l’encòp la volontat de jogar sus d’estiles, traire sas fonts dins las musicas dichas tradicionalas d’aicí e d’alai, en tot las tornar inventar, las confrontar, per se fondre dins de ressons electronics modèrnes.
Per començar, l’istorian Jòrdi Labouysse nos prepausarà una visita-conferéncia Tolosa antica, Tolosa d’uei tre 17h30, l’escasença de descobrir l’istòria d’aquel siti especial de la Vila Ròsa. Construsit a l’entorn del mitan del segle I, l’anfiteatre roman de Purpan es un dels sols monuments antics de Tolosa encara visibles dins sa globalitat.
Puèi, tres grops complementaris per tres concèrts a las sonoritats tradicionalas e electronicas : Platane, MAQX, e Super Parquet.
Tre 19h, Platane, encontra inspirada entre cants polifonics, percussions e musicas electronicas, vos convida a l’estransi en francés, occitan o breton. Assumissent divèrsas influéncias, Platane fa partida d’aquela generacion nòva e apassionanta qu’emanan de las musicas dichas tradicionalas.
En seguida, MAQX : dos musicians, multi-instrumentalistas de talent, qu’espandisson un mescladís inesperat de tròbas electronicas e d’instruments tradicionals o fargats a l’ostal. Un groove que calinha amb generositat la farandòla tan coma lo dancefloor pòst-industrial.
E per acabar, la musica psiquedelica d’Auvèrnha de Super Parquet ressonarà dins l’anfiteatre roman. Tròba sas originas dins un truc de culturas : enfants del balèti popular e de las musicas tradicionalas, tan coma del petaçatge electronic e del bom bom telluric dels dancefloors. Aquela tension fertila produsís un dialògue musical infinit e innovant, e autoriza tot : la jòia, la dansa, la susor, la transida, los tèrratremols e la fèsta mai que mai.

L’eveniment, labellizat Total Festum, es realizat en partenariat amb lo Musée Saint-Raymond, emb lo sosten tecnic de l’Estancabra. L’entrada es liura, e un estanquet e mai un punt de restauracion seràn a disposicion.

L’Institut d’Estudis Occitans seccion Nauta-Garona (IEO 31) es una associacion que ten per tòca la promocion e la diffusion de la cultura e de la lenga occitanas, a Tolosa e dins lo quite departament de Nauta-Garona. L’IEO 31 organiza entre autres lo Festenal Occitània aital coma d’eveniments culturals tota al long de l’annada. Prepausa tanben de corses d’occitan per adultes tot nivèl e gerís la librariá occitana La Tuta d’Òc.