Venus

Trobada dins lo ròdol dei vestigis dau teatre roman d'Arle en 1651, l'estatua d'Afrodita, que dison "Venus d'Arle" seriá de Praxitèl.

Siguèt mandada a Paris vintados ans puei sus l'exigéncia de Loís XIV (e non ofèrta per la Comuna coma ditz lo cartèl dau Musèu, ara!), Rei Soleu, que non! Rei Raubaire!

A l'ora d'ara aquela òbra de la decadéncia elenistica se tròba au musèu dau Louvre, A Paris.

Se vòli anar mirar aquela beutat, imatge de devocien provençala au siecle XVII, me'n costarà aperaquí 250€ : tren, hotel, bilhetas ...Adonc l'accès a la cultura me costarà.

Un Parisenc que vòudriá faire la muma causa, e s'anar vèire ce que - ieu va pensi - es una presa coloniala au mume titre que lei vestigis egipcians qu'a tornat Napoleon - li costarà lo prètz dau metrò, e benleu de la bilheta.

Un recent article de Michel Feltin Palas m'informa qu'amé lo budget de la Cultura francès, 139€ ajudan ce que se debana a Paris, per chasque abitant de la capitala, e 15, pas mai, la mejana deis autrei ciutadans francès.

80% de la vida culturala dei Parisencs es finançada per l'Estat. E vosautres, braveis artistas dau país, vos dison que totei lei budgets son a baissar, e que vos fau trobar autre causa...

Adonc, lo vaquí lo simbòle de nòstre estatut de col(h)onisat...

Polida, non ?

Ah! la botiga dau Musèu dau Louvre ne'n vendiá de copias per mai o mens 600€ fa dètz ans, ara podrètz ajustar aquela soma an aquelei dau viatge...Muma Amazon pòu vos en liurar. Mai aurètz la muma au Musèu de l'Antica en Arle, aqueu qu'a de problèmas financiers qu'aurà pas lo Louvre, aquò's segur.

Au mes de mai passat leis emplegats dau musèu arlatenc faguèron la cauma per reclamar leis efectius que li dona pas lo Consèu Despartamentau de Bocas-dau-Ròse, diguèron...Es que nosautres pagam l'impòst puslèu per lo monde que trabalha au Louvre.

L'originau de nòstra istòria a Paris, la copia au país...

Sensa mai autre comentàri.